کپاس اور چاول کی برآمدات میں کمی، تجارتی خسارہ 9.4 ارب ڈالر تک جا پہنچا

مالی سال 2025-26 کی پہلی سہ ماہی میں پاکستان کا تجارتی خسارہ بڑھ کر 9.4 ارب ڈالر تک پہنچ گیا ہے، جس کی بنیادی وجوہات میں ٹیکسٹائل سیکٹر کی سست کارکردگی اور چاول کی برآمدات میں نمایاں کمی شامل ہے۔

پاکستان بیورو آف شماریات کے جاری کردہ اعدادوشمار کے مطابق جولائی تا ستمبر کے عرصے میں برآمدات 3.88 فیصد کمی کے ساتھ 7.6 ارب ڈالر رہیں، جو گزشتہ سال کے اسی عرصے میں 7.9 ارب ڈالر تھیں۔ اس دوران درآمدات 13.9 فیصد بڑھ کر 17 ارب ڈالر تک پہنچ گئیں، جو گزشتہ سال 14.95 ارب ڈالر تھیں۔

خوراک کی برآمدات میں پہلی سہ ماہی کے دوران 31.42 فیصد کمی دیکھی گئی۔ چاول کی برآمدات 42 فیصد کم ہوئیں، جن میں باسمتی چاول کی برآمدات 43.64 فیصد اور دیگر اقسام (ایری-6 اور ایری-9) 41.10 فیصد کم رہیں۔ شدید بارشوں اور سیلاب کے باعث سبزیوں اور تمباکو کی برآمدات میں بھی بالترتیب 41 اور 48 فیصد کمی ہوئی۔ اس دوران چینی کی برآمدات مکمل طور پر بند رہیں جبکہ تیل دار بیجوں، میوہ جات اور مغز جات کی برآمدات 68 فیصد کم ہوئیں۔

تاہم مچھلی اور اس سے تیار مصنوعات کی برآمدات میں 28 فیصد اور پھلوں کی برآمدات میں 17 فیصد اضافہ ہوا۔

ٹیکسٹائل برآمدات میں مجموعی طور پر 5.63 فیصد اضافہ ہوا۔ نٹ ویئر، کاٹن کلاتھ، تولیے، تیار ملبوسات اور خیموں کی برآمدات میں بالترتیب 12، 12، 7، 6 اور 38 فیصد اضافہ ہوا، جبکہ خام کپاس کی برآمدات صفر رہیں۔

دیگر مینوفیکچرنگ مصنوعات میں کارپٹ اور لیدر کی برآمدات میں بالترتیب 13 اور 4 فیصد کمی ہوئی، تاہم سیمنٹ کی برآمدات میں 52 فیصد اور کھیلوں کے سامان (فٹ بال، دستانے وغیرہ) میں 19 فیصد اضافہ ریکارڈ کیا گیا۔

ادھر درآمدات میں پٹرولیم مصنوعات، پام آئل، موبائل فونز، اور لوہا و اسٹیل سکریپ کی درآمدات میں نمایاں اضافہ ہوا، جبکہ قدرتی گیس (ایل این جی) کی درآمدات میں 33 فیصد کمی ریکارڈ کی گئی۔

کاپی رائٹ بزنس ریکارڈر، 2025