حوثی حملے میں زخمی فلپائنی ملاح جان کی بازی ہار گیا

فلپائن کی حکومت نے بتایا ہے کہ ڈچ کارگو شپ کے فلپائنی عملے کا ایک رکن خلیج عدن میں گزشتہ ہفتے حوثی باغیوں کے حملے میں زخمی ہونے کے بعد جان کی بازی ہار گیا۔

یمن کے حوثی باغیوں نے 29 ستمبر کو مصروف سمندری راستے میں ایم وی منیروگراخت پر حملے کی ذمہ داری قبول کی تھی، جس کے نتیجے میں جہاز پر آگ لگ گئی اور دو افراد زخمی ہوئے۔

فلپائن کے محکمہ مہاجر کارکنان نے بدھ کو بتایا کہ زخمی ہونے والا دوسرا فلپائنی عملہ رکن صحت یاب ہو رہا ہے، جبکہ دیگر 10 فلپائنی عملے کے افراد کو ہفتے کے اختتام پر منیلا واپس بلا لیا گیا ہے۔

محکمہ مہاجر کارکنان کے وزیر ہانس کاکڈاک نے سوشل میڈیا پلیٹ فارم ایکس پر بتایا کہ فلپائنی حکام مرنے والے ملاح کی بہن اور بیوی کے ہمراہ جبوتی جا رہے ہیں ، تاکہ جہاز کے مالک سے ملاقات کریں اور مرحوم کے جسد خاکی کی وطن واپسی کے انتظامات کریں۔

حوثیوں کا کہنا ہے کہ ان کے تجارتی بحری جہازوں پر حملے اسرائیل-حماس جنگ کے دوران غزہ میں فلسطینیوں کی حمایت کے طور پر کیے جا رہے ہیں۔

یہ ایران نواز گروپ یمن کے وسیع علاقوں پر قابض ہے، جن میں دارالحکومت صنعاء بھی شامل ہے۔