انکم ٹیکس ریٹرن جمع کرانے کی آخری تاریخ 30 ستمبر ہی ہے، ایف بی آر

فیڈرل بورڈ آف ریونیو (ایف بی آر) نے دوٹوک انداز میں وضاحت کی ہے کہ ٹیکس ایئر 2025 کے لیے انکم ٹیکس ریٹرنز جمع کرانے کی آخری تاریخ میں کسی قسم کی توسیع نہیں کی گئی، اور 30 ستمبر ہی ریٹرنز جمع کرانے کی حتمی تاریخ ہے۔

پیر کے روز جاری کردہ ایک بیان میں ایف بی آر نے ان غیر مصدقہ خبروں پر نوٹس لیا جو مختلف میڈیا پلیٹ فارمز پر گردش کر رہی تھیں کہ ٹیکس ایئر 2025 کے لیے انکم ٹیکس ریٹرنز جمع کرانے کی تاریخ بڑھا دی جائے گی۔

ایف بی آر نے واضح کیا کہ یہ رپورٹس بالکل غلط، بے بنیاد اور گمراہ کن ہیں کیونکہ ٹیکس ایئر 2025 کے لیے انکم ٹیکس ریٹرنز جمع کرانے کی آخری تاریخ میں کوئی توسیع نہیں کی گئی۔

ایف بی آر نے کہا کہ ٹیکس دہندگان کی بڑی تعداد ایسے علاقوں میں رہتی ہے جو سیلاب سے متاثر نہیں ہوئے، اور انہیں ریٹرنز جمع کرانے کے لیے کافی وقت فراہم کیا گیا ہے تاکہ وہ اپنے قومی فریضے کو پورا کر سکیں۔

مزید کہا گیا کہ یہ دعویٰ بھی بے بنیاد ہے کہ ایف بی آر کا آئرس سسٹم سست روی کا شکار ہے۔ ادارے نے وضاحت کی کہ آئرس پلیٹ فارم مکمل طور پر فعال اور بلا رکاوٹ کام کر رہا ہے، اور ٹیکس دہندگان نئی سادہ انکم ٹیکس ریٹرن فارم کے ذریعے آسانی سے ریٹرنز جمع کرا سکتے ہیں۔

ایف بی آر نے خبردار کیا کہ آخری تاریخ تک ریٹرن جمع نہ کرانے والوں کو لیٹ فائلر کا درجہ دیا جائے گا اور قانون کے تحت ان پر جرمانے عائد ہوں گے۔

بیان میں کہا گیا کہ ایف بی آر تمام اہل ٹیکس دہندگان سے پرزور اپیل کرتا ہے کہ وہ ذمہ داری کا مظاہرہ کرتے ہوئے اپنی انکم ٹیکس ریٹرنز درستگی اور ایمانداری کے ساتھ 30 ستمبر 2025 کی آخری تاریخ سے پہلے جمع کرائیں تاکہ کسی بھی قانونی نتائج سے بچا جا سکے۔

ایف بی آر نے مزید وضاحت کی کہ اگر کسی ٹیکس دہندہ کو شدید مشکلات کا سامنا ہو تو وہ 30 ستمبر تک واجب الادا ٹیکس ادا کر کے پندرہ دن کی توسیع حاصل کر سکتا ہے، بشرطیکہ یہ توسیع متعلقہ کمیٹی کی منظوری سے دی جائے گی۔

گزشتہ ہفتے پاکستان کیمیکل اینڈ ڈائز مرچنٹس ایسوسی ایشن (پی سی ڈی ایم اے) کے چیئرمین سلیم ولی محمد نے مطالبہ کیا تھا کہ انکم ٹیکس ریٹرن جمع کرانے کی آخری تاریخ میں فوری توسیع کی جائے کیونکہ ریٹرن فائلنگ کے عمل میں اچانک اور بڑے پیمانے پر تبدیلیاں کی گئی ہیں۔

تاہم ایف بی آر نے واضح کیا کہ انکم ٹیکس ریٹرن فارم 2025 میں اثاثوں کی حقیقی مارکیٹ ویلیو ظاہر کرنے کے حوالے سے کسی بھی ایس آر او کے ذریعے کوئی تبدیلی یا ترمیم نہیں کی گئی۔