ویتنام میں طوفان بیولوی کے پیش نظر ہزاروں افراد کا انخلا

ویتنام نے اتوار کے روز تیز رفتار اور شدید طوفان بیولوی کے خدشے کے پیش نظر ساحلی ہوائی اڈے بند کر دیے اور ہزاروں افراد کو ممکنہ متاثرہ علاقوں سے محفوظ مقامات پر منتقل کرنا شروع کر دیا۔ یہ طوفان چند روز قبل فلپائن میں تباہی مچانے کے بعد ویتنام کی طرف بڑھ رہا ہے، جہاں اس نے کم از کم 10 افراد کی جان لی اور بڑے پیمانے پر سیلاب کا باعث بنا۔

ویتنامی محکمہ موسمیات کے مطابق طوفان کی رفتار اتوار کی صبح 2 بجے جی ایم ٹی تک 133 کلومیٹر فی گھنٹہ (83 میل فی گھنٹہ) ریکارڈ کی گئی۔ طوفان کے تیز رفتاری کے باعث پہلے کے اندازوں سے کہیں جلدی اتوار کی رات وسطی ویتنام کے ساحل سے ٹکرانے کا امکان ہے۔ حکام کا کہنا ہے کہ یہ طوفان اوسط رفتار کے مقابلے میں تقریباً دگنی تیزی سے بڑھ رہا ہے اور اس کی شدت اور اثرات کا دائرہ وسیع ہے۔ اس سے ایک ساتھ متعدد قدرتی آفات جیسے شدید بارشیں، طوفانی ہوائیں، فلڈ، لینڈ سلائیڈنگ اور ساحلی آبادیوں میں پانی بھرنے کا خطرہ ہے۔

حکومتی بیان کے مطابق صوبہ ہا تین میں 15 ہزار سے زائد افراد کو محفوظ مقامات پر منتقل کرنے کا عمل شروع کر دیا گیا ہے جبکہ ہزاروں فوجی اہلکار ہنگامی صورتحال میں مدد کے لیے تیار ہیں۔ شہری ہوابازی اتھارٹی نے اعلان کیا کہ چار ساحلی ہوائی اڈوں بشمول ڈانانگ انٹرنیشنل ایئرپورٹ کو اتوار کے روز بند کر دیا گیا ہے جبکہ کئی پروازوں کے اوقات میں بھی تبدیلی کی گئی ہے۔

قبل ازیں، شدید بارشوں کے باعث ہوئے اور کوانگ تری کے علاقوں میں پانی بھر گیا۔ یاد رہے کہ ویتنام جنوبی بحیرہ چین کے رخ پر طویل ساحلی پٹی رکھتا ہے اور اکثر جان لیوا طوفانوں کی زد میں آتا ہے۔ گزشتہ سال آنے والے طوفان ”یاگی“ نے تقریباً 300 افراد کی جان لی تھی اور 3.3 بلین ڈالر سے زائد کے مالی نقصانات پہنچائے تھے۔