ایران پر پابندیوں کے نفاذ میں تاخیر، سلامتی کونسل میں روس اور چین کی قرارداد پر ووٹنگ ہوگی

اقوام متحدہ کی سلامتی کونسل جمعہ کو روس اور چین کی جانب سے پیش کی گئی ایک قرارداد پر ووٹنگ کرے گی، جس میں ایران پر پابندیوں کے دوبارہ نفاذ کو چھ ماہ کے لیے مؤخر کرنے کی تجویز دی گئی ہے، تاہم سفارتکاروں کا کہنا ہے کہ اس کے منظور ہونے کے امکانات کم ہیں۔

اقوام متحدہ کی تمام پابندیاں ایران پر جمعہ کو امریکی مشرقی وقت کے مطابق رات 8 بجے (ہفتہ 0000 جی ایم ٹی) دوبارہ عائد ہونے والی ہیں، جب برطانیہ، فرانس اور جرمنی نے تہران پر 2015 کے اس معاہدے کی خلاف ورزی کا الزام لگاتے ہوئے 30 روزہ عمل شروع کیا تھا، جو ایران کو ایٹمی ہتھیار بنانے سے روکنے کے لیے طے پایا تھا۔

15 رکنی سلامتی کونسل میں کسی قرارداد کی منظوری کے لیے کم از کم 9 ووٹ درکار ہوتے ہیں اور برطانیہ، فرانس یا امریکہ کی جانب سے کوئی ویٹو نہ ہو۔

سفارتکاروں نے کہا ہے کہ ووٹنگ میں بڑی تعداد میں رکن ممالک کے غیر حاضر رہنے کا امکان ہے اور اس متن کی منظوری مشکل دکھائی دیتی ہے۔

ایران اور یورپی طاقتیں اس ہفتے آخری کوشش کے طور پر ایک ایسا معاہدہ کرنے کی کوشش کر رہی ہیں جس کے تحت پابندیوں کے نفاذ کو مؤخر کیا جا سکے اور تہران کے ایٹمی پروگرام پر طویل المدتی مذاکرات کے لیے وقت نکالا جا سکے۔

برطانیہ، فرانس اور جرمنی نے ایران کو چھ ماہ تک تاخیر کی پیشکش کی ہے، بشرطیکہ وہ اقوام متحدہ کے ایٹمی معائنہ کاروں کو دوبارہ رسائی دے، اپنے افزودہ یورینیم کے ذخائر پر خدشات دور کرے اور امریکہ کے ساتھ مذاکرات میں شامل ہو۔

ایران کے صدر مسعود پزشکیان نے جمعرات کو کہا کہ تہران کسی بھی صورتحال کا مقابلہ کرنے کے لیے پوری طرح تیار ہے اور اگر اقوام متحدہ کی پابندیاں بحال ہو گئیں تو اپنی پالیسیوں میں ردوبدل کرے گا، تاہم انہوں نے امید ظاہر کی کہ پابندیاں دوبارہ نافذ نہیں ہوں گی۔