یمن پر اسرائیلی فضائی حملے، 9 افراد جاں بحق، 170 سے زائد زخمی

یمن کے حوثیوں کے مطابق جمعرات کو اسرائیلی فضائی حملوں میں کم از کم 9 افراد ہلاک اور 170 سے زائد زخمی ہوگئے۔ یہ کارروائی ایک روز بعد کی گئی جب حوثی باغیوں نے جنوبی اسرائیل پر ڈرون حملہ کیا تھا۔

عینی شاہدین کے مطابق صنعاء کے مختلف مقامات پر دھماکے سنے گئے اور دھوئیں کے بادل اٹھتے دیکھے گئے۔ حوثی میڈیا کا کہنا ہے کہ نشانہ بنائے گئے مقامات میں ایک حراستی مرکز بھی شامل تھا۔

اسرائیلی فوج نے دعویٰ کیا کہ حملوں میں حوثیوں کے جنرل اسٹاف ہیڈکوارٹرز، فوجی کیمپ، ہتھیاروں کے ذخائر اور ڈرون لانچنگ مراکز تباہ کیے گئے۔ اسرائیلی وزیر دفاع اسرائیل کاتز نے کہا کہ کارروائی میں دہشت گردوں کے متعدد مراکز کو شدید نقصان پہنچایا گیا اور مزید حملوں کی وارننگ بھی دی۔

حوثیوں کے ترجمان نے کہا کہ متاثرین میں قیدی بھی شامل ہیں۔ الصور اور ویڈیوز میں رہائشی عمارتوں کے شیشے ٹوٹے اور گلیوں میں ملبہ بکھرا نظر آیا۔

یہ حملے اس وقت ہوئے جب حوثی رہنما عبدالملک الحوثی کا ہفتہ وار خطاب نشر ہونا تھا۔ حکام نے عوام کو ہدایت دی کہ نشانہ بننے والے مقامات کی ویڈیوز نہ پھیلائیں۔

ایک روز قبل حوثیوں نے اسرائیلی سیاحتی مقام ایلات پر ڈرون حملہ کیا تھا، جس میں 22 افراد زخمی ہوئے۔

حوثی باغی غزہ جنگ کے آغاز 2023 سے اسرائیل پر میزائل اور ڈرون حملے کر رہے ہیں اور اسرائیل سے منسلک جہازوں کو بھی نشانہ بنا رہے ہیں۔ جواب میں اسرائیل یمن میں بجلی گھروں، بندرگاہوں اور صنعاء ایئرپورٹ سمیت بنیادی ڈھانچے کو نشانہ بنا رہا ہے۔

اس ماہ کے اوائل میں اسرائیلی حملوں میں 46 افراد ہلاک ہوئے تھے، جن میں دو صحافی بھی شامل تھے۔