بلوچستان گرین انرجی اور صنعتی کانفرنس 19 اگست کو کراچی میں ہوگی

بلوچستان گرین انرجی اور صنعتی ترقی کانفرنس 19 اگست کو کراچی میں منعقد ہوگی، جسے بلوچستان بورڈ آف انویسٹمنٹ اینڈ ٹریڈ (بی بی آئی ٹی) اور فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) مشترکہ طور پر منظم کریں گے۔ اس موقع پر بلوچستان حکومت کے محکمہ توانائی اور صنعتیں نئے منصوبے متعارف کرائیں گی۔

کانفرنس میں بڑی تعداد میں قومی و بین الاقوامی سرمایہ کاروں کے علاوہ سفارت کار بھی شرکت کریں گے۔ بی بی آئی ٹی کے وائس چیئرمین بلال خان کاکڑ نے کہا کہ یہ کانفرنس بلوچستان کے اقتصادی مستقبل کے لیے ایک اہم قدم ہے اور صوبے میں موجود سرمایہ کاری کے مواقع اور صلاحیت کو اجاگر کرے گی۔

ان کا کہنا تھا کہ یہ تقریب بلوچستان میں صنعتی اور تجارتی ترقی کے نئے دروازے کھولے گی اور مقامی و غیر ملکی سرمایہ کاروں کو دعوت دی جاتی ہے کہ وہ آئیں، مواقع کا جائزہ لیں اور فائدہ اٹھائیں۔ انہوں نے مزید کہا کہ وزیراعلیٰ میر سرفراز بگٹی کے وژن کے تحت صوبے میں پائیدار ترقی کے لیے اقدامات جاری ہیں اور دنیا کو یہ سمجھنا ہوگا کہ بلوچستان اب امن، ترقی اور سرمایہ کاری کا مرکز بن چکا ہے۔

کانفرنس کا بنیادی مقصد نہ صرف بلوچستان کے قدرتی وسائل اور توانائی کے شعبے میں صلاحیت کو اجاگر کرنا ہے بلکہ صنعتی ترقی، بنیادی ڈھانچے اور دیگر سرمایہ کاری کے شعبوں میں پائیدار ترقی کے مواقع بھی فراہم کرنا ہے۔

کانفرنس میں پیش کیے جانے والے منصوبے توانائی، ماحولیاتی تحفظ، معدنیات، صنعتی زونز اور جدید بنیادی ڈھانچے پر مرکوز ہوں گے۔