فیڈرل بورڈ آف ریونیو (ایف بی آر) نے فنانس ایکٹ 2025 کے بعض اہم نفاذی نکات میں نرمی کا اعلان کر دیا ہے، جن میں ٹیکس فراڈ کے مقدمات میں گرفتاری سے متعلق شقیں اور نقد رقم کی بینک اکاؤنٹ میں جمع کرانے کو بینکنگ چینل کے ذریعے ادائیگی تصور کرنا شامل ہیں۔
پیر کے روز جاری کیے گئے انکم اور سیلز ٹیکس بجٹ کی وضاحتی سرکلرز کے ذریعے ایف بی آر نے ان تبدیلیوں سے آگاہ کیا۔
انکم ٹیکس سرکلر کے مطابق، سیکشن 21(s) کے تحت یہ وضاحت کی گئی ہے کہ اگر کوئی شخص، خواہ وہ این ٹی این ہولڈر ہو یا نہ ہو، انوائس کے عوض نقد رقم فروخت کنندہ کے بینک اکاؤنٹ میں جمع کراتا ہے تو یہ ادائیگی بینکنگ چینل کے ذریعے تصور کی جائے گی، اور اس مد میں کاروباری اخراجات کی منسوخی نہیں کی جائے گی۔
ایف بی آر نے مزید وضاحت کی کہ بینکنگ کمپنیوں، مالیاتی اداروں یا حکومتی سیکیورٹیز میں سرمایہ کاری سے حاصل شدہ منافع پر ٹیکس کی شرح 15 فیصد سے بڑھا کر 20 فیصد کر دی گئی ہے۔ تاہم، نیشنل سیونگ اسکیمز یا پوسٹ آفس سیونگ اکاؤنٹ جیسے ذرائع سے حاصل شدہ منافع پر ٹیکس کی شرح میں کوئی تبدیلی نہیں کی گئی، اور یہ سابقہ شرح پر ہی برقرار رہے گی۔ اس حوالے سے ضروری ترامیم فرسٹ شیڈول کے حصہ سوم کی ڈویژن 1A میں شامل کر دی گئی ہیں۔
قبل ازیں، ٹینتھ شیڈول میں نان فائلرز کے لیے منافع پر ٹیکس کی شرح 35 فیصد مقرر تھی، جو اب ختم کر دی گئی ہے۔ فنانس ایکٹ 2025 کے تحت اب ٹیکس سال 2026 سے نان فائلرز کے لیے منافع پر حاصل آمدنی پر ٹیکس کی شرح میں 100 فیصد اضافہ نافذ العمل ہوگا۔
علاوہ ازیں، انکم ٹیکس آرڈیننس 2001 میں نیا سیکشن 175AA شامل کیا گیا ہے، جس کے تحت ایف بی آر کو یہ اختیار حاصل ہوگا کہ وہ ٹیکس دہندگان کی انکم ٹیکس، سیلز ٹیکس ریٹرن اور مالی یا دولت گوشواروں میں دی گئی معلومات کو بینکوں کے ساتھ ڈیٹا بیس الگورتھمز کے ذریعے شیئر کرے تاکہ معلومات کا تقابلی جائزہ لیا جا سکے۔
جب ضروری عمل مکمل ہو جائے گا، تو شیڈولڈ بینکس ایف بی آر کو ایسی بینک ٹرانزیکشنز کی معلومات فراہم کریں گے جو ایف بی آر کے پاس موجود ڈیٹا سے مختلف ہوں گی۔ یہ نظام ٹیکس کے خطرات کی نشاندہی اور بہتر نگرانی میں مددگار ثابت ہوگا۔ ایف بی آر نے یقین دہانی کرائی ہے کہ یہ معلومات خفیہ رکھی جائیں گی اور صرف ٹیکس مقاصد کے لیے استعمال ہوں گی۔
کاپی رائٹ بزنس ریکارڈر، 2025
Comments
Comments are closed.