جولائی: مہنگائی بڑھنے کی شرح میں 4.1 فیصد اضافہ

جولائی 2025 کے دوران ملک کی سالانہ بنیاد پر مجموعی مہنگائی بڑھنے کی شرح 4.1 فیصد ریکارڈ کی گئی جب کہ جون 2025 میں یہ شرح 3.2 فیصد تھی۔

ادارہ شماریات پاکستان کے جمعہ کو جاری کردہ اعدادوشمار کے مطابق ماہانہ بنیاد پر مہنگائی بڑھنے کی شرح میں جولائی کے دوران 2.9 فیصد اضافہ ہوا جبکہ جون میں یہ اضافہ صرف 0.2 فیصد اور جولائی 2024 میں 2.1 فیصد تھا۔

جولائی 2024 میں سالانہ مہنگائی (سی پی آئی) 11.09 فیصد کی بلند سطح پر ریکارڈ کی گئی تھی۔

گزشتہ چند برسوں سے پاکستان کو مہنگائی جیسے مستقل معاشی چیلنج کا سامنا ہے۔ مئی 2023 میں مہنگائی بڑھنے کی شرح بلند ترین سطح 38 فیصد تک پہنچ گئی تھی، تاہم اس کے بعد سے مہنگائی میں بتدریج کمی کا رجحان جاری ہے۔

مہنگائی کی موجودہ شرح حکومت کی توقعات کے مطابق ہے۔

وزارت خزانہ کی جانب سے جولائی کے لیے مہنگائی کی متوقع حد 3.5 سے 4.5 فیصد کے درمیان رکھی گئی تھی، جو حالیہ اعدادوشمار سے مطابقت رکھتی ہے۔ رپورٹ میں کہا گیا ہے کہ قیمتوں میں استحکام اور رسد کی بہتری کے باعث قیمتوں کے دباؤ میں کمی آ رہی ہے۔

وزارت کے مطابق مالی سال 2026 کے ابتدائی مہینوں میں معیشت کی بحالی کا عمل جاری رہے گا، جسے بہتر معاشی اشاریوں اور سرمایہ کاروں کے بڑھتے ہوئے اعتماد سے تقویت مل رہی ہے۔

تاہم جولائی کی مہنگائی کی شرح بعض بروکریج اداروں کی توقعات سے زیادہ رہی۔

اسماعیل اقبال سیکیورٹیز نے جولائی کے لیے 3.1 فیصد مہنگائی کی پیشگوئی کی تھی۔

بروکریج ہاؤس کے مطابق جولائی 2025 کے لیے مہنگائی کی شرح 3.1 فیصد متوقع ہے جو گزشتہ سال اسی عرصے میں 11.1 فیصد تھی، یہ قیمتوں کے دباؤ میں مسلسل کمی کو ظاہر کرتی ہے۔

شہری و دیہی مہنگائی کا جائزہ

ادارہ شماریات کے مطابق جولائی 2025 میں شہری علاقوں میں سالانہ بنیاد پر مہنگائی کی شرح 4.4 فیصد رہی جو جون میں 3.0 فیصد اور جولائی 2024 میں 13.2 فیصد تھی۔

ماہانہ بنیاد پر جولائی 2025 کے دوران شہری مہنگائی بڑھنے کی شرح میں 3.4 فیصد اضافہ ہوا جو جون میں 0.1 فیصد اور جولائی 2024 میں 2.0 فیصد تھی۔

دوسری جانب جولائی 2025 میں دیہی علاقوں میں سالانہ بنیاد پر مہنگائی بڑھنے کی شرح 3.5 فیصد رہی، جو جون میں 3.6 فیصد اور جولائی 2024 میں 8.1 فیصد ریکارڈ کی گئی تھی۔

ماہانہ بنیاد پر جولائی 2025 میں دیہی مہنگائی میں 2.2 فیصد اضافہ ہوا، جو کہ گزشتہ ماہ (جون) میں 0.5 فیصد اور جولائی 2024 میں بھی 2.2 فیصد تھی۔