ٹرمپ کا درجنوں ممالک کی مصنوعات پر بھاری ٹیرف عائد کرنے کا اعلان

امریکی صدر ڈونلڈ ٹرمپ نے جمعہ کی ڈیڈ لائن سے قبل درجنوں ممالک کی برآمدات پر بھاری درآمدی ڈیوٹیاں عائد کر دیں، جن میں کینیڈا، برازیل، بھارت اور تائیوان شامل ہیں۔ اس اقدام کا مقصد عالمی تجارتی نظام کو دوبارہ ترتیب دینا ہے۔

نئے صدارتی حکم نامے کے تحت کینیڈا پر 35 فیصد، برازیل پر 50 فیصد، بھارت پر 25 فیصد، تائیوان پر 20 فیصد اور سوئٹزرلینڈ پر 39 فیصد ٹیرف عائد کیے گئے ہیں۔

کل 69 تجارتی شراکت داروں پر درآمدی ٹیرف 10 سے 41 فیصد کے درمیان مقرر کیے گئے ہیں جو سات دن بعد نافذ العمل ہوں گے۔ کچھ اشیاء کو عارضی استثنیٰ حاصل ہوگا۔

صدر ٹرمپ نے کہا کہ کئی ممالک کے ساتھ مذاکرات کے باوجود وہ امریکہ کے ساتھ تجارتی توازن یا سیکیورٹی امور پر متفق نہیں ہو سکے۔

کینیڈا پر خصوصی طور پر فینٹانائل کی اسمگلنگ روکنے میں ناکامی کا الزام لگا کر 35 فیصد ٹیرف عائد کیا گیا۔ وزیر اعظم مارک کارنی نے اس فیصلے پر مایوسی کا اظہار کیا اور ملکی برآمدات کو متنوع بنانے کا عزم کیا۔

میکسیکو کو 90 دن کی مہلت دی گئی ہے تاکہ وہ نیا تجارتی معاہدہ طے کر سکے، البتہ اسٹیل، آٹوز اور کچھ اشیاء پر ٹیرف برقرار رہیں گے۔

بھارت کے ساتھ مذاکرات زرعی شعبے تک رسائی پر تعطل کا شکار ہیں، جس پر ٹرمپ نے 25 فیصد ٹیرف کا اعلان کیا۔ بھارتی حکومت نے زرعی شعبے کے تحفظ کا عزم ظاہر کیا، جبکہ اپوزیشن نے اس اقدام پر سخت تنقید کی۔

یہ اقدامات ایسے وقت میں سامنے آئے جب امریکہ میں گھریلو اشیاء کی قیمتوں میں نمایاں اضافہ ریکارڈ کیا گیا، جسے ان ٹیرف کا نتیجہ قرار دیا جا رہا ہے۔

عدالتی سطح پر بھی ٹرمپ کے ٹیرف اقدامات پر سوالات اٹھ رہے ہیں اور اپیل کورٹ میں ان کے صدارتی اختیارات پر اعتراض کیا جا رہا ہے۔