فیلڈ مارشل عاصم منیر کا دہشتگردی کے خاتمے اور بلوچستان کی سماجی و اقتصادی ترقی کے عزم کا اعادہ
آرمی چیف فیلڈ مارشل سید عاصم منیر نے دہشت گردی کے ناسور کو جڑ سے ختم کرنے اور بلوچستان کی سماجی و اقتصادی ترقی کو قومی یکجہتی اور انضمام کے لیے ناگزیر قرار دیتے ہوئے پاک فوج کے غیر متزلزل عزم کا اعادہ کیا۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف نے یہ بات 16ویں نیشنل ورکشاپ بلوچستان کے شرکا سے خطاب کرتے ہوئے کہی، جس میں ارکانِ پارلیمنٹ، سول سوسائٹی کے نمائندگان، سرکاری افسران، ماہرینِ تعلیم، میڈیا سے وابستہ افراد اور نوجوانوں سمیت مختلف شعبہ ہائے زندگی سے تعلق رکھنے والے اسٹیک ہولڈرز نے شرکت کی۔
آئی ایس پی آر کے مطابق آرمی چیف نے بلوچستان میں جاری ترقیاتی منصوبوں کے کلیدی کردار کو اجاگر کیا اور صوبے کی ترقی و قومی پیش رفت کے لیے ادارہ جاتی ہم آہنگی اور مربوط قومی حکمتِ عملی کی ضرورت پر زور دیا۔
مزید برآں فیلڈ مارشل نے بھارت کی جانب سے دہشت گرد نیٹ ورکس کی کھلی سرپرستی کی سخت الفاظ میں مذمت کی اور کہا کہ یہ بھارت کی بلوچستان کے عوام کی گہری حب الوطنی کو کمزور کرنے کی ناکام کوشش ہے۔
انہوں نے واضح کیا کہ بھارت، جو معرکۂ حق میں شکست کھا چکا ہے، اب اپنی مذموم سازشوں کو عملی جامہ پہنانے کے لیے پراکسی جنگ کو تیز کر چکا ہے۔ انہوں نے خاص طور پر فتنہ الخوارج اور فتنہ الہندوستان کو بھارت کی پاکستان کے خلاف ہائبرڈ جنگ کے مہرے قرار دیا۔
آرمی چیف نے کہا کہ یہ تمام پراکسی گروہ بھی اسی انجام اور رسوائی کا شکار ہوں گے جو انہیں معرکۂ حق میں ہوئی۔
اپنے خطاب میں آرمی چیف نے اس بات پر زور دیا کہ دہشت گرد کسی مذہب، فرقے یا قومیت کی تمیز نہیں کرتے، اس لیے ان کے خلاف ایک متحد، مربوط اور قومی سطح کے ردعمل کی ضرورت ہے۔ انہوں نے اس خطرے سے نمٹنے کے لیے قومی سطح پر اجتماعی عزم اور یکجہتی کی اہمیت پر زور دیا۔
پاکستان کے علاقائی امن کے عزم کا اعادہ کرتے ہوئے، آرمی چیف نے کہا کہ قوم ہر قسم کے داخلی و خارجی خطرات کا بھرپور، مؤثر اور فیصلہ کن جواب دینے کے لیے تیار ہے تاکہ قومی وقار کا تحفظ اور عوام کی فلاح و بہبود یقینی بنائی جا سکے۔
Comments
Comments are closed.