ایشیائی بینک نے لیہ گٹیریز کو پاکستان سمیت خطے کیلئے نیا ڈائریکٹر جنرل مقرر کردیا

ایشین ڈویلپمنٹ بینک (اے ڈی بی) نے لیہ گٹیریز کو اپنے سینٹرل اور ویسٹ ایشیا ڈپارٹمنٹ کا ڈائریکٹر جنرل مقرر کیا ہے۔

ڈائریکٹر جنرل کی حیثیت سے، گٹیریز سینٹرل اور ویسٹ ایشیا ریجن میں اے ڈی بی کا اسٹریٹجک ایجنڈا نافذ کریں گی۔ وہ افغانستان، آرمینیا، آذربائیجان، جارجیا، قازقستان، کرغیز ریپبلک، پاکستان، تاجکستان، ترکیہ، ترکمانستان اور ازبکستان سمیت 11 ممالک کے ساتھ اے ڈی بی کی شراکت داری کی قیادت کریں گی۔ ان کی تعیناتی آج سے مؤثر ہو گئی ہے۔

گٹیریز نے کہا کہ مجھے اس عہدے پر خدمات انجام دینے کا اعزاز حاصل ہے اور میں رکن ترقی پذیر ممالک اور اسٹیک ہولڈرز کے ساتھ روابط جاری رکھوں گی تاکہ پورے خطے میں جامع ترقی، علاقائی تعاون اور پائیدار ترقی کو فروغ دیا جا سکے۔

اے ڈی بی کے مطابق گٹیریز کو پیشہ ورانہ تجربے کے چار دہائیوں سے زیادہ کا تجربہ حاصل ہے، جس میں سے 25 سال اے ڈی بی میں شامل ہیں۔

اپنی موجودہ تعیناتی سے قبل گٹیریز اے ڈی بی کے سیکٹرز ڈپارٹمنٹ 3 کی ڈائریکٹر جنرل تھیں، جہاں انہوں نے مالیات، انسانی اور سماجی ترقی، اور پبلک سیکٹر مینجمنٹ و گورننس سے متعلق آپریشنز کی نگرانی کی۔

فلپائنی شہریت رکھنے والی گٹیریز کے پاس امریکہ کی یونیورسٹی آف پنسلوانیا سے اکنامکس میں پی ایچ ڈی اور ماسٹرز کی ڈگری ہے، جبکہ انہوں نے یونیورسٹی آف دی فلپائنز سے بزنس اکنامکس میں بیچلرز کیا۔

1966 میں قائم ہونے والا اے ڈی بی 69 اراکین کی ملکیت ہے، جن میں سے 50 خطے سے ہیں۔