اسرائیل غزہ کے صحافیوں کو بھوکا رکھ کر خاموش کرا رہا ہے، سی پی جے

صحافیوں کے تحفظ کی کمیٹی (سی پی جے) نے بدھ کو 100 سے زائد امدادی اداروں کی فوری اپیل کی حمایت کرتے ہوئے کہا ہے کہ غزہ میں صحافیوں اور دیگر شہریوں کو اسرائیل کی جانب سے بھوکا رکھنے کا سلسلہ بند کیا جائے۔ اداروں نے ممالک سے مطالبہ کیا کہ زندگیاں بچائیں اس سے پہلے کہ بچانے کے لیے کوئی باقی نہ رہے۔

سی پی جے کی ریجنل ڈائریکٹر سارہ قدح نے کہا کہ اسرائیل غزہ کے صحافیوں کو بھوکا رکھ کر خاموش کرا رہا ہے۔ وہ صرف رپورٹر نہیں ہیں بلکہ محاذِ جنگ کے گواہ ہیں، جنہیں چھوڑ دیا گیا ہے کیونکہ بین الاقوامی میڈیا کو واپس بلایا جا چکا ہے اور ان کے داخلے پر پابندی ہے۔ دنیا کو اب کارروائی کرنا ہوگی: انہیں تحفظ دیں، خوراک فراہم کریں، اور صحت یاب ہونے کا موقع دیں تاکہ دوسرے صحافی ان کی جگہ رپورٹنگ کر سکیں۔ ان کی 650 دن سے زائد جنگی رپورٹنگ کے جواب میں انہیں بھوکا مار دینا ناقابلِ قبول ہے۔

منگل کو سی پی جے نے وائسز فرام غزہ کے عنوان سے ایک ویڈیو سیریز جاری کی جس میں فلسطینی صحافیوں نے غزہ میں رپورٹنگ کے دوران پیش آنے والے مسائل بیان کیے۔ پہلی ویڈیو میں معاذ الکحلوت نے بتایا کہ ان کا کزن انسانی امداد کا انتظار کرتے ہوئے گولی مار کر قتل کر دیا گیا۔

مئی میں جب اسرائیل نے 11 ہفتے طویل غزہ کی مکمل ناکہ بندی جزوی طور پر ختم کی، سی پی جے نے چھ صحافیوں کی شہادتیں شائع کیں جنہوں نے بتایا کہ بھوک، چکر آنا، دماغی دھندلاہٹ اور بیماری نے ان کی رپورٹنگ کی صلاحیت کو شدید متاثر کیا۔