بنیز لمیٹڈ کا بجلی کے اخراجات کم کرنے کیلئے ایک میگاواٹ سولر پاور منصوبہ

متعدد کمپنیوں کے نقشِ قدم پر چلتے ہوئے پاکستان کی بیکری مصنوعات بنانے والی کمپنی بنیز لمیٹڈ نے بتدریج قابلِ تجدید توانائی کے استعمال کی طرف پیش رفت شروع کر دی ہے، جس کے تحت کمپنی نے شمسی توانائی کی پیداوار کو ایک میگاواٹ تک بڑھانے کا منصوبہ بنایا ہے۔

پہلے مرحلے میں کمپنی نے 200 کے وی اے گنجائش کے سولر پینلز خرید کر نصب کر دیے ہیں۔ کمپنی کی جانب سے جمعرات کو پاکستان اسٹاک ایکسچینج (پی ایس ایکس) کو دی گئی اطلاع کے مطابق، ان پینلز کی تنصیب سے بجلی کے بل میں تقریباً 15 فیصد کمی آئے گی۔

بیان میں مزید کہا گیا کہ دوسرے مرحلے میں کمپنی کی مینجمنٹ شمسی توانائی کی پیداوار کو 1 میگاواٹ تک بڑھانے پر کام کر رہی ہے، جس سے بجلی کے بل میں تقریباً 50 فیصد مزید کمی آئے گی۔

کمپنی نے یہ بھی بتایا کہ قابلِ تجدید توانائی کے اس منصوبے کے تحت اس نے بائیو گیس کا استعمال بھی شروع کر دیا ہے، جو روایتی ایندھن جیسے سوئی گیس، ایل پی جی اور ایل این جی کے مقابلے میں 30 فیصد سستی ہے۔

کمپنی کا کہنا ہے کہ مینجمنٹ کو امید ہے کہ یہ لاگت کم کرنے کی کوششیں پیداوار کی لاگت کو کم کریں گی اور کمپنی کی مجموعی منافع بخشی کو بہتر بنائیں گی۔

اس ماہ کے آغاز میں ہی بنیز لمیٹڈ نے اسلام آباد کے آئی-9 انڈسٹریل ایریا میں واقع اپنے پلانٹ سے روٹی کی کمرشل پیداوار کا آغاز کیا ہے۔ کمپنی نے اس موقع پر بتایا تھا کہ اس بریڈ لائن کی تنصیب شدہ گنجائش لاہور کی موجودہ بریڈ لائن کے تقریباً 25 فیصد کے برابر ہے۔

بنیز لمیٹڈ کو 1980 میں پاکستان میں پرائیویٹ لمیٹڈ کمپنی کے طور پر قائم کیا گیا تھا، جو بعد ازاں پبلک لمیٹڈ کمپنی میں تبدیل ہو گئی۔ کمپنی کی بنیادی سرگرمی بیکری اور دیگر غذائی مصنوعات کی تیاری اور فروخت ہے۔

پاکستان میں حالیہ برسوں میں متبادل توانائی بالخصوص شمسی توانائی کی طرف رجحان میں نمایاں اضافہ ہوا ہے، جو رہائشی اور تجارتی شعبوں میں تیزی سے مقبول ہو رہی ہے۔ اس بڑھتے رجحان نے پالیسی سازوں کو اس کے قومی گرڈ اور توانائی کے شعبے پر اثرات سے نمٹنے پر مجبور کر دیا ہے کیونکہ بجلی کی کھپت جمود کا شکار ہے۔

اس کے باوجود، اس نسبتاً سستی توانائی کے ذریعہ سے فائدہ اٹھانے کے لیے کئی منصوبے شروع کیے جا چکے ہیں۔ اس ماہ کے آغاز میں دیوان سیمنٹ لیمیٹڈ نے کراچی میں اپنے مینوفیکچرنگ پلانٹ پر 6 میگاواٹ سولر پاور سسٹم کامیابی سے نصب کیا۔

مئی میں انٹرنیشنل اسٹیلز لیمیٹڈ (آئی ایس ایل)، جو انٹرنیشنل انڈسٹریز لیمیٹڈ کی ذیلی کمپنی ہے، نے کراچی میں اپنے کارخانے میں 6.4 میگاواٹ شمسی توانائی کا منصوبہ مکمل اور فعال کیا۔

مارچ میں طارق کارپوریشن لیمیٹڈ ، جو چینی اور اس کی ضمنی مصنوعات کی تیاری میں مصروف ہے، نے اپنے پلانٹ پر 200 کلوواٹ سولر پاور سسٹم لگانے کے منصوبے کا اعلان کیا۔