شدید جھڑپوں کے بعد شامی افواج نے اقلیتی صوبے سے انخلا کر لیا، مانیٹرنگ گروپ

شامی حکومت کی افواج نے کئی روزہ فرقہ وارانہ خونریزی کے بعد دروز اقلیت کے مرکز سمجھے جانے والے صوبہ السویدہ سے مکمل طور پر انخلا کر لیا ہے، جیسا کہ ایک جنگی مانیٹر اور مقامی عینی شاہدین نے جمعرات کو بتایا۔

یہ انخلا اُس وقت عمل میں آیا جب اسلام پسند عبوری صدر احمد الشرا نے ٹیلی ویژن پر خطاب میں اعلان کیا کہ السویدہ میں سیکیورٹی کی ”ذمہ داری“ مذہبی عمائدین اور بعض مقامی گروہوں کو ”قومی مفاد کے پیش نظر“ سونپی جا رہی ہے۔

شامی مبصر برائے انسانی حقوق کے سربراہ رامی عبدالرحمن نے اے ایف پی کو بتایا کہ شامی حکام نے السویدہ شہر اور پورے صوبے سے اپنی افواج واپس بلالی ہیں، اور ان کی جگہ دروز جنگجو تعینات ہو چکے ہیں۔

جن سرکاری فوجیوں نے صوبے سے انخلا کیا، انہوں نے اے ایف پی کو بتایا کہ انخلا کا حکم بدھ کی رات تقریباً 12 بجے ملا، اور انہوں نے صبح سویرے انخلا مکمل کر لیا۔

مقامی نیوز ویب سائٹ ”سویدا 24“ کے ایڈیٹر ان چیف ریان معروف نے اے ایف پی کو بتایا کہ السویدہ شہر میں اب کسی سرکاری فورس کی موجودگی نظر نہیں آتی۔

حکومت نے منگل کے روز شہر میں اس دعوے کے ساتھ افواج تعینات کی تھیں کہ وہ دروز جنگجوؤں اور سنی بدو قبائل کے درمیان کئی دنوں سے جاری مہلک جھڑپوں کے بعد ایک جنگ بندی کی نگرانی کریں گے۔

تاہم عینی شاہدین کے مطابق، سرکاری افواج نے بجائے اس کے کہ ثالثی کا کردار ادا کریں، خود بدو قبائل کے ساتھ مل کر دروز جنگجوؤں اور عام شہریوں پر حملے شروع کر دیے۔

اس کے ردعمل میں ہمسایہ ملک اسرائیل نے شامی فوج پر حملے کیے، جن میں دمشق میں فوجی ہیڈکوارٹر کو بھی نشانہ بنایا گیا، اور اسرائیل نے خبردار کیا کہ جب تک اسلام پسند حکومت جنوبی شام سے اپنی افواج واپس نہیں بلاتی، حملے جاری رہیں گے۔

اسرائیل، جہاں تقریباً 1,50,000 دروز شہری آباد ہیں، متعدد بار کہہ چکا ہے کہ وہ شام میں دروز برادری کا فرقہ وارانہ تشدد میں تحفظ کرے گا، خاص طور پر تب سے جب سے اسلام پسندوں نے دسمبر میں طویل عرصے سے برسر اقتدار رہنے والے صدر بشار الاسد کو اقتدار سے ہٹا دیا۔

اسرائیلی فوج، جو گولان ہائیٹس میں اقوام متحدہ کے زیر نگرانی غیر فوجی علاقے کا کنٹرول سنبھال چکی ہے اور شام میں سینکڑوں فضائی حملے کر چکی ہے، نے یہ بھی واضح کر دیا ہے کہ وہ اپنی سرحد پر شامی فوج کی موجودگی برداشت نہیں کرے گی۔

اگرچہ اسرائیل نے شام کے نئے حکمرانوں سے ابتدائی روابط قائم کیے ہیں، تاہم وہ اب بھی ان پر شدید تحفظات رکھتا ہے، جن میں صدر الشرا بھی شامل ہیں، جن کی تحریک ”تحریر الشام“ کا ماضی میں القاعدہ سے تعلق رہا ہے۔