روسی وزیر خارجہ سرگئی لاوروف نے ہفتے کو ساحلی شہر وونسان میں اپنے شمالی کوریا کے ہم منصب سے ملاقات کی۔ روسی سرکاری خبر رساں ایجنسی ٹی اے ایس ایس کے مطابق ملاقات کے دوران پیانگ یانگ نے یوکرین میں روس کی فوجی کارروائیوں کی حمایت کا اعادہ کیا۔
سرگئی لاوروف جمعہ کو ملائیشیا کے دارالحکومت کوالالمپور سے آسیان کے وزرائے خارجہ کی ملاقات کے بعد روانہ ہوئے اور اسی روز شمالی کوریا کے شہر وونسان پہنچے، جو ایک نیا اوپن ساحلی ریزورٹ ہے لیکن اپنے میزائل اور بحری سہولیات کے لیے بھی جانا جاتا ہے۔
روسی وزیر خارجہ کا دورہ دونوں ممالک کے درمیان اعلیٰ سطح ملاقاتوں کا تازہ ترین سلسلہ ہے، کیونکہ وہ اپنی اسٹریٹجک تعاون کو اپ گریڈ کرتے ہوئے اب ایک باہمی دفاعی معاہدہ بھی شامل کررہے ہیں۔
ٹی اے ایس ایس کے مطابق سرگئی لاوروف نے کہا کہ ہم نے یوکرینی بحران کے گرد و نواح کی صورتحال پر تبادلہ خیال کیا… ہمارے کوریائی دوستوں نے خصوصی فوجی آپریشن کے تمام مقاصد، نیز روسی قیادت اور مسلح افواج کے اقدامات کے لیے اپنی مضبوط حمایت کا اعادہ کیا۔
شمالی کوریا نے روس کے کورسک علاقے میں تعمیر نو کے لیے 6,000 فوجی انجینئرز اور تعمیراتی ماہرین بھیجنے پر اتفاق کیا ہے، جہاں یوکرینی افواج نے تقریباً ایک سال پہلے بڑے پیمانے پر سرحد پار حملہ کیا تھا۔
روسی خبر رساں اداروں نے سرگئی لاوروف کے شمالی کوریا پہنچنے کی بھی اطلاع دی اور بتایا کہ وہ اس کے بعد چین جائیں گے جہاں پیر اور منگل کو منعقد ہونے والے شنگھائی تعاون تنظیم کے اجلاس میں شرکت کریں گے۔
Comments
Comments are closed.