ایران نے بدھ کے روز نیٹو کے سیکریٹری جنرل مارک روٹے کی صدر ڈونلڈ ٹرمپ کے نام اس تعریفی نوٹ کو، جس میں ایران کے اہم جوہری مراکز پر امریکی حملوں کی ستائش کی گئی تھی، ”شرمناک، قابلِ نفرت اور غیر ذمہ دارانہ“ قرار دیا ہے۔
منگل کو نیٹو سربراہی اجلاس سے قبل اپنے نوٹ میں روٹے نے ایران میں امریکی حملوں کو ”فیصلہ کن اقدام“ قرار دیتے ہوئے ٹرمپ کی تعریف کی۔ یہ حملے چند روز قبل ایران کی جوہری تنصیبات پر غیر معمولی نوعیت کے تھے۔
روٹے نے کہا کہ یہ اقدام واقعی غیرمعمولی تھا، ایسا جس کی کسی اور میں ہمت نہیں تھی۔ اس سے ہم خود کو زیادہ محفوظ محسوس کرتے ہیں۔
ایرانی وزارت خارجہ کے ترجمان اسماعیل بقائی نے سخت ردعمل دیتے ہوئے کہا کہ ایک خودمختار ریاست کے خلاف جارحیت کے ایک ’واقعی غیرمعمولی‘ مجرمانہ اقدام پر نیٹو کے سیکریٹری جنرل کی مبارکباد دینا شرمناک، قابلِ نفرت اور غیر ذمہ دارانہ ہے۔
انہوں نے سوشل میڈیا پلیٹ فارم ایکس (ایکس) پر اپنے بیان میں مزید کہا ہے کہ جو کوئی جرم کی حمایت کرتا ہے، وہ اس میں شریک سمجھا جاتا ہے۔
امریکہ نے اتوار کے روز ایران کے اہم جوہری مقامات، فردو، اصفہان اور نطنز، کو نشانہ بنایا۔ یہ حملے اسرائیل کی جانب سے 10 جون کو ایران پر بڑے پیمانے پر بمباری مہم کے 10 دن بعد کیے گئے۔
اسرائیل کے 13 جون کے حملے میں ایرانی جوہری تنصیبات کو نشانہ بنایا گیا، جس میں اعلیٰ فوجی کمانڈرز اور جوہری سائنسدان شہید ہوئے۔
ایران نے اس کے جواب میں پے در پے میزائل حملے کئے، جس کے بعد منگل کو جنگ بندی نافذ ہوئی۔
امریکی صدر ڈونلڈ ٹرمپ نے دعویٰ کیا ہے کہ امریکی حملوں نے ایران کی جوہری صلاحیتوں کو تباہ کر دیا ہے اور بدھ کو انہوں نے کہا کہ یہ حملے ایران کے جوہری پروگرام کو کئی دہائیوں تک پیچھے دھکیل چکے ہیں۔
تاہم لیک ہونے والی امریکی انٹیلی جنس رپورٹس کے مطابق امریکی حملوں سے ایران کے جوہری پروگرام کو صرف چند ماہ کے لیے پیچھے دھکیلا جا سکا ہے، جو ٹرمپ کے دعووں پر شکوک پیدا کرتا ہے۔
ایرانی حکام نے تاحال امریکی اور اسرائیلی حملوں سے ہونے والے نقصانات کی مکمل تفصیلات جاری نہیں کیں، تاہم الجزیرہ انگلش کو دیے گئے ایک انٹرویو میں ایرانی وزارت خارجہ کے ترجمان اسماعیل بقائی نے کہا ہے کہ یہ تنصیبات بری طرح متاثر ہوئی ہیں۔
Comments
Comments are closed.