اسٹار شپ کی کامیاب لینڈنگ، دوبارہ قابلِ استعمال راکٹ کی تیاری میں اہم سنگِ میل

ایلون مسک کی کمپنی اسپیس ایکس کے اسٹار شپ خلائی جہاز نے ہفتے کو خلا میں 22 گھنٹے کا سفر مکمل کرنے کے بعد زمین پر واپسی کے دوران پہلی بار دیوہیکل مکینیکل بازوؤں کی مدد سے ٹیکساس میں اپنے لانچنگ ٹاور پر لینڈنگ کی۔ یہ کامیابی مکمل طور پر دوبارہ قابلِ استعمال راکٹ تیار کرنے کی کمپنی کی ایک دہائی پر محیط کوشش میں اہم سنگِ میل ہے۔

52 میٹر بلند اسٹار شپ اسپیس ایکس کے اسٹار بیس لانچنگ مرکز پر بادلوں سے نمودار ہوا، اپنے انجن دوبارہ روشن کرکے عمودی حالت میں آیا اور آہستہ آہستہ ٹاور کے مکینیکل بازوؤں میں اتر گیا۔ اس دوران اس کے انجن چل رہے تھے۔ خلائی سفر سے واپسی پر شدید حرارت کے باعث اس کا بیرونی حصہ جھلس گیا تھا۔

اسپیس ایکس کے مطابق اسٹار شپ نے زمین کے گرد 14 چکر مکمل کیے اور تقریباً 260 کلومیٹر کی بلندی پر پرواز کے دوران 26 اسٹارلنک سیٹلائٹس بھی مدار میں چھوڑے۔

تاہم، راکٹ کا نچلا حصہ سپر ہیوی بوسٹر لانچ کے تقریباً 10 منٹ بعد واپس لانچنگ پیڈ پر اترنے میں ناکام رہا، جس کے باعث دونوں حصوں کو بیک وقت واپس حاصل کرنے کا منصوبہ مکمل نہ ہوسکا۔

ایلون مسک اسٹار شپ کو مستقبل میں اسٹارلنک سیٹلائٹ کاروبار، خلائی ڈیٹا سینٹرز، انسانوں کو چاند پر واپس بھیجنے اور مریخ پر انسانی آبادکاری کے لیے اہم ذریعہ سمجھتے ہیں۔

اسپیس ایکس اب بھی دونوں راکٹ حصوں کی مکمل بازیابی اور ہیٹ شیلڈ کو دوبارہ قابلِ استعمال بنانے پر کام کر رہی ہے۔ کمپنی اسٹار شپ کی تیاری پر 15 ارب ڈالر سے زائد خرچ کرچکی ہے، جبکہ ناسا نے چاند پر انسانی مشن کے لیے 3.2 ارب ڈالر فراہم کیے ہیں۔