مضبوط ڈالر اور امریکی شرحِ سود میں اضافے کے خدشات، سونا ایک ہفتے کی کم ترین سطح پر آگیا

سونے کی قیمتوں میں جمعرات کو کمی ریکارڈ کی گئی اور یہ ایک ہفتے سے زائد عرصے کی کم ترین سطح پر آگئیں۔ توقعات سے زیادہ امریکی افراطِ زر کے اعداد و شمار اور فیڈرل ریزرو حکام کے سخت پالیسی مؤقف پر مبنی بیانات کے باعث ڈالر مضبوط ہوا جس سے آئندہ ماہ شرح سود میں اضافے کے امکانات مزید مستحکم ہوگئے۔

اسپاٹ گولڈ کی قیمت 0.2 فیصد کمی کے بعد 3,977.99 ڈالر فی اونس پر آگئی جبکہ اس سے قبل کاروبار کے دوران یہ 4 نومبر کے بعد کی کم ترین سطح تک گرگئی تھی۔

امریکی گولڈ فیوچرز برائے دسمبر کی قیمت بھی 0.4 فیصد کمی کے بعد 3,983.20 ڈالر فی اونس ہوگئی۔

جمعرات کو ڈالر دیگر بڑی کرنسیوں کے مقابلے میں 19 ماہ کی بلند ترین سطح پر پہنچ گیا جس کے باعث دوسری کرنسیوں کے حامل خریداروں کے لیے ڈالر میں قیمت والا سونا مہنگا ہوگیا۔

گلوبل میکرو کے سربراہ ایلیا اسپیواک نے کہا کہ امریکی افراطِ زر کے اعدادوشمار اور شرح سود میں اضافے کی توقعات بڑھنے کے بعد گزشتہ چند روز کے دوران سونے کی مارکیٹ میں نمایاں گراوٹ آئی، تاہم ان کے خیال میں مارکیٹ اس کمی کو مزید آگے بڑھانے کے لیے واضح سمت اختیار کرنے میں مشکلات کا شکار ہے۔

اگلے ماہ فیڈرل ریزرو کی جانب سے شرح سود میں نصف فیصد اضافے کے امکانات اس وقت بڑھ گئے جب منگل کو جاری اعدادوشمار کے مطابق اکتوبر میں امریکی افراطِ زر توقعات سے زیادہ تیزی سے بڑھا جبکہ پالیسی سازوں نے بھی مالیاتی پالیسی مزید سخت کرنے کے عندیے دیے۔

سی ایم ای فیڈ واچ ٹول کے مطابق مارکیٹ میں اب یہ توقع مکمل طور پر ظاہر کی جارہی ہے کہ امریکی مرکزی بینک آئندہ ماہ شرح سود میں اضافہ کرے گا جبکہ اگلے سال مارچ میں بھی ایک اور اضافے کا امکان ہے۔

اگرچہ سونے کو عموماً افراطِ زر کے خلاف تحفظ کا ذریعہ سمجھا جاتا ہے، تاہم شرح سود میں اضافے سے سونا رکھنے کی موقع لاگت بڑھ جاتی ہے، کیونکہ اس پر کوئی منافع حاصل نہیں ہوتا جس سے سرمایہ کاروں کے لیے اس کی کشش کم ہوجاتی ہے۔

اب مارکیٹ کے شرکا جمعہ کو جاری ہونے والی امریکی پروڈیوسر پرائس انڈیکس (پی پی آئی) رپورٹ کے منتظر ہیں۔

او سی بی سی کے تجزیہ کاروں نے اپنے نوٹ میں کہا کہ قریبی مدت میں مارکیٹ کو دونوں سمتوں میں خطرات لاحق ہیں جبکہ تیل کی قیمتیں، بانڈز پر منافع کی شرح اور امریکی ڈالر اہم محرکات رہیں گے۔

ان کے مطابق معاشی حالات سونے کے لیے پہلے کی نسبت کم سازگار ہوگئے ہیں، تاہم درمیانی مدت میں سونے کے امکانات کے حوالے سے ان کا مؤقف منفی نہیں ہوا۔

دوسری جانب دیگر دھاتوں میں بدھ کو اسپاٹ پیلیڈیم کی قیمت 0.5 فیصد اضافے سے 1,032.63 ڈالر فی اونس ہوگئی جبکہ اس سے قبل یہ 22 اکتوبر کے بعد بلند ترین سطح پر پہنچ گیا تھا۔