امریکی فیڈرل ریزرو کے اشاروں اور افراطِ زر کے اعدادوشمار کا انتظار، سونے کی قیمتیں گرگئیں

سونے کی قیمتوں میں جمعرات کو کمی ریکارڈ کی گئی کیونکہ سرمایہ کار امریکی فیڈرل ریزرو کے پالیسی اشاروں اور چیئرمین کیون وارش کے بیانات کا جائزہ لے رہے تھے۔ فیڈرل ریزرو کے پالیسی سازوں کی جانب سے شرحِ سود برقرار رکھنے کے بعد سرمایہ کار دن کے آخر میں جاری ہونے والے اہم امریکی افراطِ زر کے اعدادوشمار کے منتظر تھے تاکہ شرحِ سود کے مستقبل کے حوالے سے مزید اشارے مل سکیں۔

اسپاٹ گولڈ کی قیمت صبح 4 بجکر 10 منٹ تک 0.7 فیصد کمی کے بعد 4,037.98 ڈالر فی اونس پر آ گئی جبکہ دسمبر میں فراہمی کے لیے امریکی گولڈ فیوچرز کی قیمت 4,049.80 ڈالر پر مستحکم رہی۔

ممبئی میں قائم کیڈیا کموڈیٹیز کے ڈائریکٹر اجے کیڈیا نے کہا کہ آج قیمتوں میں کمی کی بنیادی وجہ مشرقِ وسطیٰ میں مسلسل غیر یقینی صورتحال اور آج جاری ہونے والے افراطِ زر کے اعداد و شمار سے قبل مارکیٹ میں سرمایہ کاروں کی پوزیشننگ ہے۔

امریکی فیڈرل ریزرو نے بدھ کو توقعات کے مطابق شرحِ سود 3.75 سے 4.00 فیصد کی حد میں برقرار رکھی۔ فیڈ نے قرض لینے کی لاگت میں کسی بھی تبدیلی کو اگلے ہفتے ہونے والے امریکی وسط مدتی انتخابات کے بعد تک مؤخر کرنے کا فیصلہ کیا جبکہ مہنگائی سے متعلق مزید اعدادوشمار کا انتظار کیا جارہا ہے۔

سی ایم ای کے فیڈ واچ ٹول کے مطابق اب سرمایہ کار دسمبر میں شرحِ سود میں اضافے کے تقریباً 78 فیصد امکان کو مدنظر رکھ رہے ہیں جبکہ اعلان سے قبل یہ امکان 84 فیصد تھا۔

شرحِ سود میں اضافہ غیر منافع بخش سونے کو رکھنے کی متبادل لاگت بڑھا دیتا ہے، جس سے سرمایہ کاروں کے لیے اس کی کشش کم ہو جاتی ہے۔مارکیٹ کی نظریں اب ذاتی کھپت کے اخراجات کے اعدادوشمار پر ہیں جو گرینچ معیاری وقت کے مطابق دوپہر 12 بج کر 30 منٹ پر جاری کیے جائیں گے۔ یہ مہنگائی کا ایک اہم پیمانہ ہے جس پر فیڈرل ریزرو گہری نظر رکھتا ہے کیونکہ اس کا ہدف مہنگائی کی شرح کو 2 فیصد تک رکھنا ہے۔

عالمی بینک نے بدھ کے روز کہا کہ 2026 میں عالمی اجناس کی قیمتوں میں 23 فیصد اضافے کا امکان ہے۔ بینک کے مطابق اس اضافے کی وجوہات میں توانائی کی بڑھتی ہوئی قیمتیں، مشرقِ وسطیٰ کی جنگ کے دوران بحری مال برداری میں رکاوٹیں، بحیرۂ اسود میں اناج کی ترسیل کے مسائل اور سونے جیسے محفوظ سرمایہ کاری کے اثاثوں کی بلند طلب شامل ہیں۔

دوسری جانب ہانگ کانگ کے محکمۂ مردم شماری و شماریات کے بدھ کو جاری کردہ اعداد و شمار کے مطابق، ستمبر میں ہانگ کانگ کے راستے چین کی خالص سونے کی درآمدات اگست کے مقابلے میں 28 فیصد سے زیادہ بڑھ کر پانچ ماہ کی بلند ترین سطح پر پہنچ گئیں۔

جغرافیائی و سیاسی محاذ پر وال اسٹریٹ جرنل نے بدھ کو رپورٹ کیا کہ امریکی نائب صدر جے ڈی وینس نے ایران کے ساتھ امن مذاکرات دوبارہ شروع کرنے کی کوشش کے تحت ایرانی سلامتی کونسل کے سربراہ محسن رضائی کو خط بھیجا ہے۔

دیگر قیمتی دھاتوں میں اسپاٹ چاندی کی قیمت 1.5 فیصد کمی کے بعد 53.15 ڈالر فی اونس پر آ گئی، پلاٹینم 1.5 فیصد گر کر 1,515.70 ڈالر جبکہ پیلیڈیم 0.6 فیصد کمی کے بعد 1,004.25 ڈالر فی اونس پر آ گیا۔