پاکستان سمیت 8 ممالک کا غزہ سے فلسطینیوں کی جبری بے دخلی مسترد کرنے کا اعلان

پاکستان اور سات دیگر مسلم ممالک نے غزہ کی پٹی سے فلسطینیوں کی بے دخلی سے متعلق بیانات اور تجاویز کی شدید مذمت کرتے ہوئے انہیں بین الاقوامی قانون کی خلاف ورزی اور فلسطینیوں کے حقوق کے لیے خطرہ قرار دیا ہے۔

پاکستان، مصر، انڈونیشیا، اردن، قطر، سعودی عرب، ترکیہ اور متحدہ عرب امارات کے وزرائے خارجہ نے جاری کیے گئے مشترکہ بیان میں فلسطینیوں کو ان کی سرزمین سے بے دخل کرنے کی کسی بھی کوشش یا منصوبے کو مسترد کر دیا، خواہ یہ بے دخلی مقبوضہ فلسطینی علاقے کے اندر ہو یا اس سے باہر۔

وزرائے خارجہ نے بالخصوص اسرائیلی قومی سلامتی کے وزیر اتمار بن گویر اور اسرائیلی وزیر دفاع اسرائیل کاٹز کے غزہ سے فلسطینیوں کی بے دخلی سے متعلق بیانات کی مذمت کی، جن میں انہیں زبردستی بے دخل کرنے کے طریقہ کار کی تجاویز بھی شامل تھیں۔

انہوں نے خبردار کیا کہ جبری بے دخلی کے مطالبات کو سرکاری پالیسی یا عملی اقدامات میں تبدیل کرنا امن کے حصول کے لیے جاری بین الاقوامی کوششوں کو نقصان پہنچائے گا۔ ان کوششوں میں امریکی صدر ڈونلڈ ٹرمپ کا غزہ تنازع ختم کرنے کا جامع منصوبہ بھی شامل ہے، جس میں واضح طور پر جبری بے دخلی کو مسترد کیا گیا ہے۔

وزرائے خارجہ نے زور دیا کہ غزہ کی پٹی مقبوضہ فلسطینی علاقے کا ایک لازمی حصہ ہے۔ انہوں نے غزہ اور مغربی کنارے سمیت پورے فلسطینی علاقے کی وحدت برقرار رکھنے کا مطالبہ کیا، جس میں مشرقی یروشلم بھی شامل ہے۔

انہوں نے اس بات کا اعادہ کیا کہ منصفانہ اور پائیدار امن صرف دو ریاستی حل پر عمل درآمد کے ذریعے ہی حاصل کیا جا سکتا ہے۔ اس حل کے تحت 4 جون 1967 کی سرحدوں کی بنیاد پر ایک آزاد فلسطینی ریاست کا قیام عمل میں لایا جائے، جس کا دارالحکومت مشرقی یروشلم ہو اور یہ متعلقہ بین الاقوامی قراردادوں کے مطابق ہو۔

وزرائے خارجہ نے عالمی برادری، بالخصوص اقوام متحدہ کی سلامتی کونسل پر زور دیا کہ وہ اپنی ذمہ داریاں پوری کرے اور مقبوضہ فلسطینی علاقے میں نئی آبادیاتی یا جغرافیائی حقیقت مسلط کرنے کی کوششوں کی بھرپور مخالفت کرے۔

انہوں نے فلسطینی عوام کی اپنی سرزمین پر ثابت قدمی کی حمایت کا اعادہ کیا اور فلسطینی کاز کو ختم کرنے یا ان کے جائز حقوق کو نقصان پہنچانے کی کوششوں کو مسترد کر دیا۔