برطانیہ میں غلط سمت سے آنے والی گاڑی پولیس کار سے ٹکرا گئی، 7 افراد ہلاک

شمال مشرقی انگلینڈ میں ہفتے کے روز ایک کار حادثے میں دو پولیس اہلکاروں سمیت سات افراد ہلاک ہوگئے۔ مقامی پولیس کے مطابق ایک گاڑی بڑی شاہراہ پر غلط سمت سے آتے ہوئے پولیس کی مخصوص گاڑی سے ٹکرا گئی۔

کلیولینڈ پولیس کے مطابق حادثہ مڈلزبرا کے مشرق میں ساؤتھ بینک کے قریب رات 3 بج کر 39 منٹ پر پیش آیا اور دونوں گاڑیوں میں سوار تمام افراد موقع پر ہی ہلاک ہوگئے۔

کلیولینڈ پولیس کی چیف کانسٹیبل وکٹوریا فلر نے کہا، ’’اس المناک حادثے کا اثر کلیولینڈ، ہماری برادریوں اور پورے پولیس کے شعبے میں محسوس کیا جائے گا۔‘‘

پولیس نے کہا کہ حادثے کی تحقیقات جاری ہیں اور تمام ہلاک افراد کی باضابطہ شناخت بھی کی جا رہی ہے۔

معمول کے طریقہ کار کے تحت اس واقعے کا جائزہ برطانیہ کے انڈیپنڈنٹ آفس فار پولیس کنڈکٹ کی جانب سے بھی لیا جائے گا۔

یہ واقعہ ڈبلن کے قریب حالیہ دو آمنے سامنے کے تصادموں کے بعد پیش آیا ہے، جن میں سے ایک میں پانچ افراد ہلاک ہوئے تھے۔ آئرلینڈ کے پولیس چیف نے رواں ہفتے خبردار کیا تھا کہ بعض نوجوان ’’سوشل میڈیا پر لائکس حاصل کرنے کے لیے‘‘ موٹروے پر گاڑیاں غلط سمت میں چلا رہے ہیں۔

آئرش پارلیمنٹ کی ایک کمیٹی نے مختصر ویڈیوز کے پلیٹ فارم ٹک ٹاک سے وضاحت طلب کی ہے کہ وہ ایسے مواد کو کس طرح ہٹاتا ہے جو ’’سڑکوں پر خطرناک اور غیر قانونی رویے کو قابلِ فخر انداز میں پیش کرتا دکھائی دیتا ہے‘‘۔ آئرلینڈ کے میڈیا ریگولیٹر نے بھی منگل کو اسی نوعیت کا مطالبہ کیا تھا۔