مشرق وسطیٰ میں تناؤ کم ہونے پر سونے کی قیمتیں بڑھ گئیں

مشرق وسطیٰ میں امریکا اور ایران کے درمیان کشیدگی میں عارضی کمی اور خام تیل کی قیمتوں میں نمایاں گراوٹ کے بعد عالمی منڈی میں پیر کو سونے کی قیمت ایک فیصد سے زائد بڑھ گئی، جبکہ سرمایہ کاروں کی توجہ امریکی فیڈرل ریزرو کے آئندہ مانیٹری پالیسی فیصلے پر مرکوز ہے۔

اسپاٹ گولڈ کی قیمت 1.4 فیصد اضافے کے ساتھ 4,110.56 ڈالر فی اونس تک پہنچ گئی، جبکہ امریکی گولڈ فیوچر ایک فیصد بڑھ کر 4,112.10 ڈالر فی اونس پر ٹریڈ کرتے رہے۔

کے سی ایم ٹریڈ کے چیف مارکیٹ تجزیہ کار ٹم واٹرر کے مطابق سونے کو خام تیل اور امریکی ڈالر دونوں کی کمزور قیمتوں سے فائدہ پہنچا ہے۔ ان کا کہنا تھا کہ امریکا اور ایران کے درمیان کشیدگی میں کمی کی امید نے تیل کی قیمتیں نیچے لائیں، جس سے مہنگائی کے خدشات میں بھی کمی آئی ہے۔

دوسری جانب امریکی ڈالر انڈیکس 0.3 فیصد گر گیا، جس سے دیگر کرنسیوں کے حامل سرمایہ کاروں کے لیے سونا نسبتاً سستا ہو گیا۔

ادھر ایک ایرانی اعلیٰ عہدیدار نے بتایا کہ اگر امریکا حملے بند رکھتا ہے تو ایران بھی اپنی کارروائیاں معطل رکھے گا۔ اس پیش رفت کے بعد عالمی منڈی میں خام تیل کی قیمتیں 4 فیصد سے زیادہ گر گئیں۔

مارکیٹ کی نظریں اس ہفتے ہونے والے امریکی فیڈرل ریزرو کے پالیسی اجلاس پر بھی جمی ہوئی ہیں، جہاں شرح سود برقرار رکھنے کی توقع کی جا رہی ہے، تاہم سرمایہ کار ستمبر میں شرح سود میں اضافے کے امکانات کا بھی جائزہ لے رہے ہیں۔

دیگر قیمتی دھاتوں میں چاندی کی قیمت 2.8 فیصد بڑھ کر 59.81 ڈالر، پلاٹینم 2.6 فیصد اضافے سے 1,629.15 ڈالر جبکہ پیلیڈیم 2.1 فیصد بڑھ کر 1,269.43 ڈالر فی اونس پر پہنچ گیا۔