امریکی کاروباری وفد آج پاکستان پہنچے گا، تجارت اور سرمایہ کاری میں تعاون بڑھانے پر بات چیت متوقع

پاکستان اور امریکا کے درمیان تجارتی، سرمایہ کاری اور معاشی تعاون کے فروغ کے لیے 40 رکنی امریکی کاروباری وفد آج پاکستان پہنچے گا۔ وفد 26 سے 31 جولائی 2026 تک پاکستان کے دورے کے دوران اسلام آباد، کراچی اور لاہور کا دورہ کرے گا۔

خصوصی سرمایہ کاری سہولت کونسل (ایس آئی ایف سی) کے مطابق امریکی وفد حکومتی عہدیداروں، کاروباری رہنماؤں اور مختلف صنعتوں کے نمائندوں سے ملاقاتیں کرے گا۔ وفد کی دلچسپی دفاعی جدت، ایرو اسپیس، خلائی ٹیکنالوجی، انفارمیشن ٹیکنالوجی، توانائی، صحت، کان کنی اور انفرااسٹرکچر سمیت اہم شعبوں میں ہے۔وفد اسلام آباد میں وزیراعظم اور نائب وزیراعظم و وزیر خارجہ سے ملاقات کے علاوہ اعلیٰ سطح کے اجلاسوں میں شرکت کرے گا۔ اس دورے کے دوران کاروباری روابط بڑھانے کے لیے بزنس ٹو بزنس ملاقاتیں، نیٹ ورکنگ سیشنز اور پالیسی بریفنگز کا بھی اہتمام کیا گیا ہے۔

وفد وزارت تجارت، راولپنڈی چیمبر آف کامرس اینڈ انڈسٹری اور ٹیکنالوجی کے شعبے سے وابستہ اداروں سے ملاقات کرے گا۔ وزارت انفارمیشن ٹیکنالوجی و ٹیلی کمیونیکیشن کے تعاون سے آئی ٹی شعبے پر خصوصی بریفنگ بھی دی جائے گی، جس میں ٹیکنالوجی کمپنیوں اور اسٹارٹ اپس کے نمائندے شریک ہوں گے۔امریکی وفد میں سرمایہ کار، کاروباری شخصیات اور ٹیکنالوجی ماہرین شامل ہیں، جو پاکستان میں مشترکہ منصوبوں، مصنوعی ذہانت، صحت، توانائی، معدنیات اور ڈیجیٹل انفرااسٹرکچر کے شعبوں میں سرمایہ کاری کے امکانات کا جائزہ لیں گے۔

وفد کے بعض ارکان پاکستان میں ٹیلی میڈیسن، مصنوعی ذہانت پر مبنی صحت کی سہولیات، روبوٹکس، میڈیکل ڈیوائسز، انشورنس اور دیگر جدید شعبوں میں تعاون بڑھانے میں دلچسپی رکھتے ہیں۔حکام کے مطابق امریکی کاروباری وفد کا دورہ پاکستان اور امریکا کے درمیان معاشی تعلقات کو مزید مضبوط بنانے، نجی شعبے کے روابط بڑھانے اور غیر ملکی سرمایہ کاری کے نئے مواقع پیدا کرنے میں اہم کردار ادا کر سکتا ہے۔