پاک امریکا باہمی تجارت کے معاہدے پر مذاکرات
- دونوں فریقین نے اختلافات دور کیے، ترجمان طاہر اندرابی
پاکستان اور امریکہ کے درمیان باہمی تجارت کے معاہدے پر مذاکرات واشنگٹن ڈی سی میں منعقد ہوئے جن کا مقصد معاہدے کو جلد از جلد حتمی شکل دینا تھا۔
وزارت خارجہ کے ترجمان طاہر اندرابی نے ہفتے کو اپنے سوشل میڈیا اکاؤنٹ پر ایک بیان میں کہا کہ مذاکرات خوشگوار ماحول میں منعقد ہوئے جس میں دونوں فریقین نے اختلافات دور کیے اور ہم آہنگی پیدا کی تاکہ معاہدے کو جلد از جلد حتمی شکل دی جاسکے۔
وفاقی سیکریٹری تجارت جواد پال جنہوں نے پاکستانی وفد کی قیادت کی نے مذاکرات کو مثبت قرار دیا اور بات چیت کے دوران ہونے والی نمایاں پیشرفت کو سراہا۔
پاکستان اور امریکہ کے درمیان باہمی تجارتی معاہدے پر مذاکرات 9 سے 10 جولائی تک واشنگٹن میں منعقد ہوئے۔
مذاکرات کا مقصد پاکستان اور امریکہ کے تجارتی تعلقات کو مزید مضبوط بنانا، دو طرفہ تجارت کو اقتصادی تعاون کے محرک کے طور پر سہولت فراہم کرنا اور موجودہ تجارت کے تنوع اور پھیلاؤ کی راہ ہموار کرنا ہے۔