سب میرین کیبل میں خرابی دور، انٹرنیٹ سروسز بحال، پی ٹی اے کی تصدیق

پاکستان ٹیلی کمیونیکیشن اتھارٹی (پی ٹی اے) نے جمعہ کو اعلان کیا ہے کہ انٹرنیٹ سب میرین کیبل ایس ایم ڈبلیو 5 میں خرابی دور کردی گئی۔

پی ٹی اے کے مطابق سب میرین کیبل اب مکمل طور پر فعال ہے اور ملک بھر میں انٹرنیٹ سروس معمول کے مطابق بلا تعطل جاری ہے۔

پی ٹی اے نے بتایا کہ اس دوران اس نے ٹرانس ورلڈ ایسوسی ایٹس (ٹی ڈبلو اے) کے ساتھ قریبی رابطہ برقرار رکھا۔ بحالی کے عمل کے دوران صارفین پر اثرات کم سے کم رکھنے اور انٹرنیٹ سروس کا تسلسل زیادہ سے زیادہ برقرار رکھنے کے لیے انٹرنیٹ ٹریفک کو متبادل بین الاقوامی لنکس کے ذریعے منتقل کیا گیا۔

اتھارٹی نے مزید کہا کہ پی ٹی اے ملک بھر میں ٹیلی کمیونیکیشن اور براڈبینڈ خدمات کی قابل اعتماد، محفوظ اور بلا تعطل فراہمی کو یقینی بنانے کے لیے پاکستان کے بین الاقوامی کنیکٹیویٹی انفرااسٹرکچر کے استحکام اور کارکردگی کی قریب سے نگرانی جاری رکھے ہوئے ہے۔

ایک روز قبل پی ٹی اے نے کہا تھا کہ وہ سب میرین کیبل سسٹم میں خرابی کے باعث انٹرنیٹ ٹریفک میں پیدا ہونے والی رکاوٹ کی قریب سے نگرانی کر رہا ہے۔

اتھارٹی نے اپنے بیان میں کہا تھا کہ انٹرنیٹ صارفین سروس کے معیار اور کنیکٹیویٹی میں وقفے وقفے سے کمی کا تجربہ کر سکتے ہیں۔

واضح رہے کہ پی ٹی اے نے سب میرین کیبل میں خرابی کی بنیادی وجہ معلوم کرنے کے لیے کام جاری رکھا ہوا تھا۔