سولر پروجیکٹس کے لئے 75 کروڑ روپے مختص
کراچی میٹروپولیٹن کارپوریشن (کے ایم سی) نے پائیدار شہری ترقی اور توانائی کی بچت کے اپنے عزم کے تحت شہر بھر میں یونین کونسل کی گلیوں، میونسپل عمارتوں اور منتخب عوامی بنیادی ڈھانچے کو شمسی توانائی (سولرائز) پر منتقل کرنے کے لیے اپنے بجٹ میں 75 کروڑ روپے مختص کیے ہیں۔
میئر کراچی مرتضیٰ وہاب نے کہا ہے کہ اس اقدام کا مقصد روایتی بجلی پر انحصار کم کرنا، آپریشنل اخراجات میں کمی لانا اور بلاتعطل شہری خدمات کو یقینی بنانا ہے، خاص طور پر ان علاقوں میں جو بجلی کی بندش سے متاثر ہوتے ہیں۔
میئر نے کہا کہ موسمیاتی تبدیلیوں سے نمٹنے کی صلاحیت اور توانائی کا پائیدار نظام اب انتخاب نہیں بلکہ ذمہ دار شہری نظم و نسق کی بنیادی ضرورت بن چکا ہے ۔ اس منصوبے کے ذریعے کے ایم سی بجلی کے اخراجات میں کمی، کاربن اخراج کو محدود کرنے اور کراچی کے شہریوں کو قابلِ اعتماد بلدیاتی خدمات فراہم کرنے کے لیے عملی اقدامات کر رہی ہے۔
میئر نے نشاندہی کی کہ کے ایم سی پہلے ہی اپنے ہیڈ آفس کے کچھ حصوں کو شمسی توانائی پر منتقل کر چکا ہے جس سے بجلی کے اخراجات میں نمایاں بچت ہوئی ہے۔
ان نتائج کی حوصلہ افزائی کے بعد اب سولرائزیشن کے اس پروگرام کو شہر بھر میں یونین کونسل کی تنصیبات، میونسپل دفاتر اور عوامی بنیادی ڈھانچے تک بڑھایا جا رہا ہے۔