گلگت بلتستان میں عام انتخابات کی تیاریاں مکمل

گلگت بلتستان میں اتوار (7 جون) کو ہونے والے عام انتخابات 2026 کے لیے تمام انتظامات مکمل کر لیے گئے ہیں۔

ضلع گلگت میں قائم تمام پولنگ اسٹیشنز پر سخت سکیورٹی انتظامات کیے گئے ہیں، جہاں تین حلقوں میں مجموعی طور پر 253 پولنگ اسٹیشن قائم کیے گئے ہیں۔

ان میں سے 154 پولنگ اسٹیشنز کو انتہائی حساس جبکہ 48 کو حساس قرار دیا گیا ہے۔ بیلٹ بکس، بیلٹ پیپرز اور دیگر ضروری انتخابی سامان متعلقہ پولنگ اسٹیشنز تک پہنچا دیا گیا ہے۔

انتخابی اعداد و شمار کے مطابق حلقہ نمبر 1 گلگت میں 23 امیدوار مدمقابل ہیں، جن میں شفیق الرحمان، الیاس صدیقی، امجد حسین اور راہ حق پارٹی کے حمایت یافتہ مولانا سلطان رئیس شامل ہیں۔ اس حلقے میں رجسٹرڈ ووٹروں کی تعداد 47,373 ہے، جن میں 25,412 مرد اور 21,961 خواتین ووٹرز شامل ہیں۔ یہاں 80 پولنگ اسٹیشن قائم کیے گئے ہیں، جن میں سے 49 کو انتہائی حساس اور 31 کو حساس قرار دیا گیا ہے۔ شفاف اور پرامن پولنگ کو یقینی بنانے کے لیے تقریباً 1,300 پولنگ عملہ اور 550 سکیورٹی اہلکار تعینات کیے گئے ہیں۔

حلقہ نمبر 2 گلگت میں 40 امیدوار انتخابی میدان میں ہیں۔ اس حلقے میں رجسٹرڈ ووٹروں کی تعداد 55,849 ہے، جن میں 29,839 مرد اور 26,010 خواتین ووٹرز شامل ہیں۔ یہاں مجموعی طور پر 91 پولنگ اسٹیشن قائم کیے گئے ہیں، جبکہ بالخصوص انتہائی حساس اور حساس پولنگ اسٹیشنز پر سکیورٹی کو ہائی الرٹ رکھا گیا ہے۔

دوسری جانب حلقہ نمبر 3 گلگت میں سب سے زیادہ 122 امیدوار مدمقابل ہیں۔ اس حلقے میں رجسٹرڈ ووٹروں کی تعداد 52,161 ہے، جن میں 27,351 مرد اور 24,810 خواتین ووٹرز شامل ہیں۔ اس حلقے میں قائم 82 پولنگ اسٹیشنز میں سے 16 کو انتہائی حساس اور مزید 16 کو حساس قرار دیا گیا ہے۔

ضلعی انتظامیہ اور قانون نافذ کرنے والے اداروں نے پرامن پولنگ کے انعقاد اور ووٹروں کو بلا خوف و خطر اپنا جمہوری حق استعمال کرنے کے لیے فول پروف سکیورٹی انتظامات مکمل کر لیے ہیں۔