بھارت کی کاکروچ جنتا پارٹی کے بانی احتجاج کیلئے نئی دہلی روانہ

بھارت میں سوشل میڈیا پر تیزی سے مقبول ہونے والی طنزیہ آن لائن جماعت کاکروچ جنتا پارٹی کے بانی ابھیجیت دیپکے نے اعلان کیا ہے کہ وہ جمعہ کو امریکہ سے نئی دہلی واپس پہنچ رہے ہیں تاکہ اپنی آن لائن مہم کو عملی احتجاج میں تبدیل کیا جا سکے۔

30 سالہ ابھیجیت دیپکے، جو بوسٹن یونیورسٹی کے گریجویٹ ہیں، نے کہا کہ وہ ہفتے کے روز بھارتی وزیر تعلیم دھرمیندر پردھان کے خلاف پرامن احتجاج کے لیے پولیس سے اجازت طلب کریں گے۔ ان کا کہنا تھا کہ وہ اپنے مقدر کو آئینِ ہند کے حوالے کرکے وطن واپس آ رہے ہیں۔

کاکروچ جنتا پارٹی گزشتہ ماہ اس وقت وجود میں آئی جب بھارتی سپریم کورٹ کے چیف جسٹس سوریا کانت سے منسوب ایک بیان سامنے آیا، جس میں حکومت پر تنقید کرنے والے نوجوانوں کو کاکروچ اور پیراسائٹس قرار دیا گیا تھا۔ بعد ازاں چیف جسٹس نے کہا کہ ان کے ریمارکس کو سیاق و سباق سے ہٹ کر پیش کیا گیا۔

دیپکے، جو ماضی میں عام آدمی پارٹی کے ساتھ کام کر چکے ہیں، نے 16 مئی کو اس فرضی سیاسی جماعت کا آغاز کیا تھا۔ نوجوانوں کے لیے، نوجوانوں کے ذریعے اور نوجوانوں کی آواز کے نعرے کے ساتھ یہ مہم سوشل میڈیا پر غیرمعمولی مقبولیت حاصل کر چکی ہے۔

رپورٹس کے مطابق کاکروچ جنتا پارٹی کے بعض سوشل میڈیا اکاؤنٹس بلاک کر دیے گئے ہیں، تاہم اس کا انسٹاگرام اکاؤنٹ اب بھی فعال ہے اور اس کے 2 کروڑ 20 لاکھ سے زائد فالوورز ہیں، جو حکمران بھارتیہ جنتا پارٹی (بی جے پی) اور اپوزیشن کانگریس پارٹی کے فالوورز سے بھی زیادہ ہیں۔

معروف سماجی کارکن سونم وانگچک نے بھی اعلان کیا ہے کہ وہ اس احتجاج میں شرکت کریں گے۔ دیپکے نے اپنے حامیوں سے اپیل کی ہے کہ وہ ایئرپورٹ پر جمع نہ ہوں اور صرف قانون کے دائرے میں رہتے ہوئے پرامن احتجاج کا حصہ بنیں۔