اپنا گھر پروگرام: میزان بینک کا بڑا سنگِ میل، 1 ارب روپے سے زائد کے قرضے جاری
- بینک 350 سے زائد نامزد شاخوں کے نیٹ ورک کے ذریعے اس پروگرام کے تحت ہاؤسنگ فنانس کی سہولیات فعال طور پر فراہم کر رہا ہے
میزان بینک کے ایزی ہوم فنانس نے وزیرِ اعظم کے اپنا گھر ہاؤسنگ فنانس پروگرام گھر ہو تو اپنا کے تحت ایک اہم سنگِ میل عبور کرلیا جس کے تحت اس اسکیم کے آغاز سے اب تک ہاؤسنگ فنانس کی مد میں دی جانے والی رقم 1 ارب روپے سے تجاوز کرگئی ہے۔
بینک کے مطابق یہ کامیابی سستے گھروں کی ملکیت کو فروغ دینے اور معاشرے کے پسماندہ (محروم) طبقات کے لیے ہاؤسنگ فنانس تک رسائی کو وسیع کرنے کے حوالے سے حکومتِ پاکستان کے وژن کی حمایت میں میزان بینک کے مضبوط عزم کی عکاسی کرتی ہے۔
پاکستان کے صفِ اول کے اسلامی بینک کے طور پر میزان بینک شریعت کے اصولوں کے عین مطابق (شریعہ کمپلائنٹ) فنانسنگ سلوشنز کے ذریعے تنخواہ دار طبقے اور کم سے متوسط آمدنی والے خاندانوں کی ضروریات کو پورا کرنے اور گھر کی ملکیت تک ان کی رسائی کو آسان بنانے کے لیے مسلسل کوشاں ہے۔
بینک پاکستان بھر میں اپنی 350 سے زائد نامزد شاخوں کے نیٹ ورک کے ذریعے اس پروگرام کے تحت ہاؤسنگ فنانس کی سہولیات فعال طور پر فراہم کر رہا ہے جس میں خاص توجہ کم آمدنی والے اور تنخواہ دار صارفین کو اپنے گھر کا خواب پورا کرنے کے قابل بنانے پر ہے۔ اپنے صارف دوست اور شریعت کے اصولوں کے عین مطابق فنانسنگ کے طریقہ کار کے ذریعے میزان بینک ملک میں مالیاتی شمولیت کو فروغ دینے اور ہاؤسنگ کے شعبے کی ترقی میں اپنا کلیدی کردار ادا کر رہا ہے۔
یہ سنگِ میل اسٹیٹ بینک کے اس وسیع تر مقصد کے حصول میں بھی مددگار ثابت ہورہا ہے جس کا مقصد سستے گھروں کی فراہمی کو فروغ دینا اور باضابطہ ہاؤسنگ فنانس تک رسائی کو بڑھانا ہے، اس طرح یہ مالیاتی شمولیت، معاشی ترقی اور معیارِ زندگی کی بہتری کے لیے کی جانے والی قومی کوششوں کو تقویت فراہم کرتا ہے۔
کاپی رائٹ بزنس ریکارڈر 2026