پاسپورٹ کے حصول میں آسانی : پروسیسنگ کا وقت کم اور ڈیجیٹل نظام رائج کرنے کا فیصلہ

وفاقی وزیر داخلہ محسن نقوی نے عوامی خدمات کی فراہمی میں بہتری لانے کے لیے پاسپورٹ کی تیاری کے وقت میں کمی اور پاسپورٹ دفاتر میں کیش لیس(ڈیجیٹل ادائیگی) نظام متعارف کرانے کا اعلان کیا ہے۔ یہ فیصلے جمعرات کو محسن نقوی اور وزیر مملکت طلال چوہدری کی زیرِ صدارت منعقدہ ایک اجلاس میں کیے گئے۔

وزارت داخلہ کے اعلامیے کے مطابق نارمل پاسپورٹ کی تیاری کا وقت 21 دن سے کم کرکے 14 دن کر دیا گیا ہے۔ محسن نقوی نے حکام کو ہدایت کی ہے کہ اگلے 15 دنوں کے اندر پاسپورٹ دفاتر میں مکمل طور پر کیش لیس نظام رائج کیا جائے۔ انہوں نے کہا کہ نقدی کی صورت میں ادائیگیوں کے خاتمے سے ایجنٹ مافیا کی بیخ کنی ہوگی اور عوام کو سہولت ملے گی۔

اجلاس میں بزنس پاسپورٹ کے اجراء پر کام تیز کرنے اور پاسپورٹ کی ہوم ڈیلیوری کے نظام کو مزید بہتر بنانے کا بھی فیصلہ کیا گیا۔ وزیر داخلہ نے اس بات پر زور دیا کہ بہتر خدمات کے لیے پاسپورٹ اتھارٹی کا قیام ناگزیر ہے۔

واضح رہے کہ 26 جنوری کو پاسپورٹ کے پورے نظام کی نگرانی کے لیے ”شیکرا“ نامی جدید ترین ڈیجیٹل سسٹم لانچ کیا گیا تھا۔ ’سیکیور ہائبرڈ انٹیلیجنس فار نالج بیسڈ رسپانس اینالیٹکس‘ نامی یہ سسٹم درخواست سے لے کر پاسپورٹ کی پرنٹنگ اور ڈیلیوری تک، چوبیس گھنٹے مکمل نگرانی فراہم کرتا ہے، جو محکمہ امیگریشن اور پاسپورٹ کی مکمل ڈیجیٹلائزیشن کی جانب ایک بڑا قدم ہے۔