وزیراعلیٰ سندھ کی یونیورسٹی روڈ پر مکس ٹریفک لینز کی بحالی کے لیے 3 ماہ کی مہلت
- مکس ٹریفک کا ٹکڑا تقریباً 12 کلومیٹر پر محیط ہے، امید ہے کہ یہ کام مقررہ تین ماہ کی مدت میں مکمل ہو جائے گا، مراد علی شاہ
وزیراعلیٰ سندھ سید مراد علی شاہ نے یونیورسٹی روڈ پر تعمیراتی کام میں تاخیر پر شہریوں سے معذرت کرتے ہوئے یقین دہانی کرائی ہے کہ مکس ٹریفک لینز کو تین ماہ کے اندر بحال کر دیا جائے گا۔
بی آر ٹی ریڈ لائن منصوبے کے دورے کے موقع پر میڈیا سے گفتگو کرتے ہوئے وزیراعلیٰ سندھ نے کہا کہ سندھ حکومت مسافروں کو درپیش مشکلات سے پوری طرح آگاہ ہے اور جلد از جلد کام مکمل کر کے ریلیف فراہم کرنے کے لیے پرعزم ہے۔
انہوں نے اعلان کیا کہ بی آر ٹی ریڈ لائن لاٹ-II کے مین کوریڈور کا ٹینڈر دوبارہ جاری کیا جائے گا۔ انہوں نے مزید بتایا کہ ڈی جی فرنٹیئر ورکس آرگنائزیشن سے بات چیت ہو چکی ہے، جنہوں نے یقین دلایا ہے کہ آئندہ دو سے تین روز میں سائٹ پر تعمیراتی سرگرمیاں دوبارہ شروع ہو جائیں گی۔
وزیراعلیٰ نے بتایا کہ مکس ٹریفک کا ٹکڑا تقریباً 12 کلومیٹر پر محیط ہے اور انہیں امید ہے کہ یہ کام مقررہ تین ماہ کی مدت میں مکمل ہو جائے گا۔ مراد علی شاہ نے اعتراف کیا کہ اگرچہ لاٹ-II کا ٹھیکہ چار سال قبل دیا گیا تھا، لیکن کام کا معیار تسلی بخش نہیں رہا۔ ذمہ داری قبول کرتے ہوئے انہوں نے ضمانت دی کہ اب اس منصوبے کو تیز رفتاری سے مکمل کیا جائے گا اور بروقت تکمیل کو یقینی بنانے کے لیے عید کی چھٹیوں کے دوران بھی کام جاری رہے گا۔ انہوں نے مزید کہا کہ آئندہ چند دنوں میں کام کی رفتار مزید تیز کر دی جائے گی، جس کے بعد دن رات شفٹوں میں کام ہو گا۔