جیتی ہوئی بازی نہیں ہارے بلکہ بری طرح پٹ گئے، شکر کانراڈ کا نیوزی لینڈ سے شکست کا اعتراف

جنوبی افریقہ کے ہیڈ کوچ شکر کانراڈ نے ٹی 20 ورلڈ کپ کے سیمی فائنل میں نیوزی لینڈ کے ہاتھوں نو وکٹوں سے شکست پر ہمت ہارنے کے تاثر کو مسترد کرتے ہوئے اسے ایک بدترین ہار قرار دیا ہے۔ ایڈن گارڈنز میں کھیلے گئے اس میچ میں جنوبی افریقہ، جو ٹورنامنٹ کی واحد ناقابلِ شکست ٹیم تھی، نیوزی لینڈ کے سامنے بے بس نظر آئی۔ نیوزی لینڈ کے فن ایلن نے صرف 33 گیندوں پر ناقابلِ شکست سنچری بنا کر اپنی ٹیم کو سات اوورز قبل ہی فتح دلا دی۔

ماضی میں سیمی فائنلز میں ناکامی کی وجہ سے جنوبی افریقہ پر چوکرز کا لیبل لگتا رہا ہے، تاہم کانراڈ نے مزاحیہ انداز میں کہا کہ آج ہم چوکرز نہیں تھے بلکہ ہمیں بری طرح مار پڑی ہے۔ گھبرا جانے کے لیے بھی میچ میں جیت کی تھوڑی بہت امید ہونا ضروری ہے لیکن ہمیں تو موقع ہی نہیں ملا۔ انہوں نے اسے بھرپور پٹائی قرار دیا۔

کوچ کا کہنا تھا کہ نیوزی لینڈ نے جنوبی افریقہ کے جارحانہ بیٹنگ لائن اپ کو صرف 169 رنز تک محدود کر کے میچ پر گرفت مضبوط کر لی تھی۔ انہوں نے کیوی سپنرز کی کارکردگی کو غیر معمولی قرار دیتے ہوئے اعتراف کیا کہ جنوبی افریقہ نے مسابقتی ہدف بورڈ پر نہیں سجایا تھا۔ دوسری جانب مین آف دی میچ فن ایلن نے اپنی کامیابی کا سہرا باؤلرز اور اپنے ساتھی اوپنر ٹم سیفرٹ کے سر باندھا، جنہوں نے 117 رنز کی فیصلہ کن شراکت قائم کی۔