نشاط گروپ کے ادارے رفحان میعظ پر کنٹرول کیلئے سرگرم، 75.69 فیصد حصص حاصل کرنے کا منصوبہ

رفحان میعظ پروڈکٹس کمپنی لمیٹڈ (آر ایم پی ایل) کو نشاط گروپ سے منسلک اداروں اور منشا خاندان کے افراد کی جانب سے کمپنی کا کنٹرول اور اس کے 75.69 فیصد تک ووٹنگ شیئرز حاصل کرنے کا پختہ ارادہ (فرم انٹینش) موصول ہوا ہے۔

یہ اطلاع کمپنی نے جمعہ کو پاکستان اسٹاک ایکسچینج کو دی گئی نوٹس میں شیئر کی۔ کمپنی کے مطابق یہ ارادہ پبلک اعلان برائے ارادہ (پی اے آءی) کے ضمیمے کے ذریعے پیش کیا گیا جسے 14 مئی 2025 کو جاری کیا گیا اور بعد ازاں 28 جولائی 2025 کو ایک اصلاحی نوٹس کے ذریعے اپ ڈیٹ کیا گیا۔

متوقع خریداروں میں نشاط ہوٹلز اینڈ پراپرٹیز لمیٹڈ، ڈی جی خان سیمنٹ کمپنی لمیٹڈ، نشاط ملز لمیٹڈ، نشاط پاور لمیٹڈ، نشاط چنیان پاور لمیٹڈ، لالپیر پاور لمیٹڈ، پاک جین پاور لمیٹڈ کے علاوہ ناز منشہ، رضا منشہ، عمر منشہ اور حسن منشہ شامل ہیں، جو مشترکہ طور پر کام کر رہے ہیں۔

کمپنی کے مطابق حصول ملکیت کا عمل ڈیُو ڈیلیجنس کی تکمیل، شرائط کی حتمی منظوری، معاہدوں کے نفاذ، اور تمام ضروری ریگولیٹری و کارپوریٹ منظوریوں کے بعد مکمل ہوگا۔ اس پیشکش کے منیجر کے طور پر نیکسٹ کیپیٹل لمیٹڈ کام کررہا ہے۔

مئی کے آغاز میں معلوم ہوا تھا کہ امریکی کمپنی انگریڈین انکارپوریٹڈ، جو خوراک اور مشروبات کے اجزاء فراہم کرتی ہے، آر ایم پی ایل میں اپنے حصص فروخت کرنے کے لیے پیشکشوں کا جائزہ لے رہی تھی۔ اس اعلان کے بعد نشاط گروپ نے 75.69 فیصد حصص حاصل کرنے کا ارادہ ظاہر کیا۔

نشاط گروپ پاکستان کے سب سے بڑے اور متنوع کاروباری اداروں میں سے ایک ہے، جس کی بنیاد میاں محمد منشہ نے رکھی اور اس کے اہم شعبے ٹیکسٹائل، بینکاری، سیمنٹ، بجلی پیداوار اور ہوٹلنگ ہیں۔

آر ایم پی ایل نے پاکستان میں 1953 میں مکئی کی ریفائننگ انڈسٹری کے طور پر آغاز کیا اور سالوں کے دوران یہ ملک کی سب سے بڑی زرعی بنیاد صنعتوں میں سے ایک بن گئی۔ کمپنی مکئی کو بنیادی خام مال کے طور پر استعمال کرتے ہوئے مختلف غذائی اجزاء اور صنعتی مصنوعات تیار کرتی ہے اور 1985 میں پبلک لمیٹڈ کمپنی میں تبدیل ہو گئی۔