پنجاب نے سانحہ لودھراں کے بعد اے آئی سے چلنے والا ‘ٹاک ٹو کیمرہ’ نظام متعارف کرا دیا
- یہ جدید نظام افسران کو قدرتی زبان میں پورے کیمرہ نیٹ ورک سے استفسار کرنے کی سہولت دیتا ہے اور خطرات کو خودکار طور پر نشان زد بھی کر سکتا ہے
پنجاب حکومت نے کھلے مین ہول کے باعث لودھراں میں بچے کی ہلاکت کے بعد پورے صوبے میں اے آئی سے چلنے والا مانیٹرنگ سسٹم ’’ٹاک ٹو کیمرا‘‘ متعارف کرانا شروع کر دیا ہے۔
وزیرِاعلیٰ پنجاب مریم نواز کی جانب سے جاری بیان کے مطابق یہ نظام پنجاب سیف سٹیز اتھارٹی ( پی ایس سی اے) نے تیار کیا ہے، جس کا مقصد رئیل ٹائم نگرانی اور عوامی تحفظ کو مؤثر بنانا ہے۔
یہ جدید نظام افسران کو قدرتی زبان میں ہدایات دے کر پورے کیمرہ نیٹ ورک سے معلومات حاصل کرنے کی سہولت فراہم کرتا ہے اور خودکار طور پر ایسے خطرات کی نشاندہی بھی کرسکتا ہے، جیسے کھلے مین ہول، بھرے ہوئے کوڑے دان اور ظاہر ہونے والا دھواں۔
یہ ٹیکنالوجی لاہور اور شیخوپورہ میں پائلٹ ٹیسٹنگ سے گزری ہے، جہاں حکام نے مثبت نتائج کی اطلاع دی ہے۔
ان ٹرائلز کے بعد صوبائی حکومت نے فیصلہ کیا ہے کہ اس نظام کو پورے پنجاب میں توسیع دی جائے تاکہ ہنگامی حالات میں فوری ردِعمل کی صلاحیت کو بہتر بنایا جا سکے اور اسمارٹ سٹی مینجمنٹ کو مضبوط کیا جا سکے۔
یہ اقدام مصنوعی ذہانت کے استعمال سے قابلِ گریز حادثات کی روک تھام اور شہری نگرانی کو مؤثر بنانے کی وسیع تر کوششوں کا حصہ ہے۔