ٹیلی کام سروس فراہم کرنے والوں کی جانب سے غلط ٹیکس ریٹرن ایس ایم ایس جاری کیا گیا ہے، ایف بی آر

وفاقی بورڈ آف ریونیو (ایف بی آر) نے پیر کو وضاحت کی ہے کہ ایک تکنیکی خرابی کے باعث ٹیکس دہندگان کو غلط ایس ایم ایس بھیجا گیا، جس میں انہیں ٹیکس ایئر 2025 کے لیے اپنی انکم ٹیکس ریٹرن 30 ستمبر 2025 کی آخری تاریخ سے پہلے جمع کرانے کا کہا گیا تھا، جو کہ اب گزر چکی ہے۔

ہر سال ستمبر میں ایف بی آر پاکستان ٹیلی کمیونی کیشن اتھارٹی (پی ٹی اے) سے رابطہ کرتا ہے تاکہ ٹیکس دہندگان کو قانونی مدت ختم ہونے سے قبل ٹیکس ریٹرن جمع کرانے کی یاد دہانی کے لیے خصوصی پیغامات بھیجے جائیں۔

بیان میں کہا گیا ہے کہ اسی معمول کے تحت، اس سال بھی ایف بی آر نے 15 ستمبر 2025 کو پی ٹی اے سے درخواست کی تھی کہ وہ ٹیکس دہندگان کو 30 ستمبر 2025 کی مقررہ آخری تاریخ سے قبل ٹیکس ریٹرن جمع کرانے کے لیے پیغامات بھیجے۔ اس کے مطابق تمام پیغامات مقررہ مدت کے اندر بھیج دیے گئے تھے۔

تاہم آج ایف بی آر کو ٹیکس دہندگان کی جانب سے متعدد شکایات موصول ہوئی ہیں کہ انہیں مختلف ٹیلی کام سروس فراہم کرنے والوں کی جانب سے ایس ایم ایس موصول ہوئے ہیں جن میں ٹیکس ایئر 2025 کی ریٹرن 30 ستمبر 2025 کی ڈیڈلائن سے قبل جمع کرانے کا کہا گیا ہے، جو کہ اب گزر چکی ہے۔

ایف بی آر نے اپنے بیان میں کہا ہے کہ تحقیقات کے بعد یہ بات تصدیق شدہ ہے کہ ایف بی آر نے ان پیغامات کے اجراء کی منظوری نہیں دی تھی۔ بظاہر یہ پیغامات ٹیلی کام سروس فراہم کرنے والوں کی جانب سے ایک تکنیکی خرابی کے باعث غلطی سے بھیجے گئے ہیں۔

مزید تحقیقات پر پی ٹی اے نے بتایا ہے کہ یہ پیغامات ٹیلی کام سروس فراہم کرنے والوں کی تکنیکی خرابی کے باعث بھیجے گئے ہیں۔

ایف بی آر نے کہا کہ وہ اس معاملے کی سرگرمی سے تحقیقات کر رہا ہے اور پی ٹی اے سے درخواست کی گئی ہے کہ وہ متعلقہ ٹیلی کام آپریٹرز کے ساتھ رابطہ کرے تاکہ مسئلے کا بروقت حل یقینی بنایا جا سکے۔