اسٹاک مارکیٹ: خریداری کا رجحان جاری،100انڈیکس تقریباً 2,200 پوائنٹس اضافے کے ساتھ بند

پاکستان اسٹاک ایکسچینج (پی ایس ایکس) میں جمعرات کے روز خریداری کا رجحان جاری رہا، جہاں کے ایس ای 100 انڈیکس تقریباً 2,200 پوائنٹس اضافے کے ساتھ بند ہوا، جس سے مارکیٹ میں سرمایہ کاروں کے اعتماد کی تجدید ظاہر ہوئی۔

ٹریڈنگ سیشن کے دوران خریداری کا رحجان غالب رہا، انڈیکس دوپہر کے بعد رفتار پکڑ گیا اور سیشن کی بلند ترین سطح کے قریب بند ہوا۔

اختتام پر کے ایس ای-100 انڈیکس 165,373.31 پوائنٹس پر بند ہوا، جو 2,184.78 پوائنٹس یا 1.34 فیصد کے اضافے کے برابر ہے۔

بروکریج ہاؤس ٹاپ لائن سیکیورٹیز کے مطابق، آج کے سیشن میں بینکنگ سیکٹر نے سب کی توجہ اپنی جانب کھینچ لی۔ ایم ای بی ایل، ایچ بی ایل، یو بی ایل اور ایم سی بی سب کے حصص کی قیمتیں پچھلے سیشن کی سطحوں کو پیچھے چھوڑتے ہوئے بلند سطح پر بند ہوئیں، جس کی وجہ صحتمند کاروباری حجم کی حمایت تھی۔

ای اینڈ پی سیکٹر بھی پیچھے نہیں رہا۔ او جی ڈی سی اور پاکستان پٹرولیم لمیٹڈ (پی پی ایل) نے سرمایہ کاروں کی دلچسپی حاصل کی اور سبز زون میں مضبوطی سے بند ہوئے، جس سے مارکیٹ کا اعتماد مزید مستحکم ہوا۔

ٹاپ لائن سیکیورٹیز نے بتایا کہ انڈیکس کے بڑے کھلاڑی، میٹرو بینک، اوجی ڈی سی، لک، پی پی ایل اور اینگرو، تیزی کے محرک کے طور پر سامنے آئے، اور انہی کی بدولت بینچ مارک کے ایس ای 100 انڈیکس میں تقریباً 942 پوائنٹس کا مجموعی اضافہ ہوا۔

پاکستان بزنس کونسل کے ڈائیلاگ آن دی اکانومی 2025 سے خطاب کرتے ہوئے وزیر خزانہ محمد اورنگزیب نے بدھ کو اندازہ ظاہر کیا کہ اس سال پاکستان کی معاشی نمو 3.5 فیصد رہے گی جب کہ آئندہ دو سے تین برسوں کے لیے 4 فیصد ترقی کی پیشگوئی کی گئی ہے۔ ان کا کہنا تھا کہ درمیانی مدت میں 6 تا 7 فیصد معاشی ترقی بھی ممکن ہے بشرطیکہ زراعت، مینوفیکچرنگ اور خدمات کے شعبوں میں مسلسل پیش رفت برقرار رہے۔

یاد رہے کہ بدھ کو بینچ مارک کے ایس ای 100 انڈیکس 1,496.04 پوائنٹس یا 0.93 فیصد بڑھ کر 163,188.53 پر بند ہوا تھا۔

عالمی منڈیوں میں جمعرات کو ایشیائی اسٹاکس میں اضافہ دیکھا گیا جبکہ امریکی ڈالر فیڈرل ریزرو کی جانب سے آئندہ ماہ ممکنہ شرح سود میں کمی کی توقعات بڑھنے کے باعث کمزور رہا۔ دوسری جانب جاپانی ین ممکنہ حکومتی مداخلت کے خدشات کے پیش نظر نگرانی میں رہا جب کہ ٹریڈرز سال کے اختتام سے قبل شرحِ سود میں اضافے کے امکان کا جائزہ لیتے رہے۔

چھٹیوں سے مختصر ہونے والے ہفتے کے باعث عالمی منڈیوں میں تیزی محدود رہی، تاہم اسٹاک مارکیٹس مجموعی طور پر مثبت انداز میں برقرار رہیں جبکہ کرنسیاں نسبتاً پرسکون رہیں کیونکہ سرمایہ کار نومبر کے اوائل میں ایکویٹیز میں پیدا ہونے والی اے آئی ببل سے متعلق خدشات کو نظرانداز کر رہے ہیں۔

امریکی مارکیٹس جمعرات کو تھینکس گیونگ کی تعطیل کے باعث بند رہیں گی اور جمعے کو مختصر سیشن میں ٹریڈ ہوں گی۔

ایم ایس سی آئی کا جاپان کے علاوہ ایشیا پیسیفک کے حصص کا وسیع ترین انڈیکس 0.4 فیصد بلند رہا جس نے وال اسٹریٹ کی مثبت رفتار کو فالو کیا اور تین ہفتوں کی مندی کے سلسلے کو توڑنے کی راہ ہموار کی۔ جاپان کا نکئی اور جنوبی کوریا کا کوسپی بھی 1 فیصد سے زائد بڑھ گئے۔

دریں اثناء انٹر بینک مارکیٹ میں جمعرات کو امریکی ڈالر کے مقابلے پاکستانی روپے کی قدر میں معمولی بہتری دیکھی گئی۔ سیشن کے اختتام پر مقامی کرنسی 280.55 روپے پر بند ہوئی، ڈالر کے مقابلے میں ایک پیسے کا اضافہ ریکارڈ کیا گیا۔

آل شیئر انڈیکس کا کاروباری حجم گھٹ کر 498.36 ملین شیئرز رہ گیا، پچھلے سیشن کے 636.41 ملین کے مقابلے میں۔ حصص کی کل مالیت بھی 30.59 ارب روپے پر محدود رہی، جو گزشتہ سیشن میں 30.92 ارب روپے تھی۔

دوست اسٹیل ملز لمیٹڈ 48.39 ملین حصص کے ساتھ کاروباری حجم میں سرِ فہرست رہی، اس کے بعد ورلڈ کال ٹیلی کام کے 36.70 ملین اور بیکو اسٹیل لمیٹڈ کے 25.11 ملین حصص ٹریڈ ہوئے۔

جمعرات کو کل 484 کمپنیوں کے حصص کا کاروبار ہوا، جن میں سے 289 حصص میں اضافہ، 152 میں کمی اور 43 میں کوئی تبدیلی نہیں ہوئی، جس سے مارکیٹ میں متوازن رجحان دکھائی دیا۔