بینظیر انکم سپورٹ پروگرام کے ڈیجیٹل والٹس رواں ماہ فعال ہو جائیں گے

حکومت نے پیر کو اعلان کیا ہے کہ بینظیر انکم سپورٹ پروگرام (بی آئی ایس پی ) کے ڈیجیٹل والٹس نومبر کے آخر تک مکمل طور پر فعال ہوجائیں گے، مستحقین کو آئندہ قسط کی ادائیگیاں والٹس کے ذریعے کی جائیں گی۔

یہ پیش رفت اسلام آباد میں وزیراعظم شہباز شریف کی صدارت میں کیش لیس معیشت سے متعلق اقدامات کے جائزہ اجلاس کے دوران سامنے آئی۔

اجلاس میں وفاقی وزراء احد خان چیمہ، محمد اورنگزیب، عطاء اللہ تارڑ، شزہ فاطمہ خواجہ، وزیر مملکت بلال اظہر کیانی، گورنر اسٹیٹ بینک جمیل احمد، چیئرمین نادرا لیفٹینینٹ جنرل محمد منیر افسر، چیرمین ایف بی آر راشد محمود لنگڑیال اور متعلقہ اعلی حکام نے شرکت کی۔

پی ایم او ہاؤس کے مطابق اجلاس کو آگاہ کیا گیا کہ بجلی اور گیس کے بل راست کیو آر کوڈز کے ذریعے کیش لیس کیے جارہے ہیں جس سے اربوں روپے کی ادائیگیاں ڈیجیٹل نظام کے ذریعے ممکن ہورہی ہیں۔

وزیراعظم کو بینظیر انکم سپورٹ پروگرام کے تحت تیار کیے جارہے ایک کروڑ ڈیجیٹل والٹس کی پیش رفت سے بھی آگاہ کیا گیا۔

اس موقع پر وزیر اعظم نے کہا کہ مکمل کیش لیس معیشت کرنے اور غیر رسمی معیشت کو ختم کرنے کے لیے دیہی علاقوں میں آگاہی بڑھائی جانی چاہیے۔

انہوں نے کہا کہ دنیا تیزی سے ڈیجیٹل معیشت کی طرف بڑھ رہی ہے اور پاکستان کو بھی باقی دنیا کے ساتھ رفتار برقرار رکھنی ہوگی۔

اجلاس کو مزید بتایا گیا کہ حکومت کی خدمات تک رسائی کے لیے اسلام آباد میں قائم موبائل ایپلیکیشن کو راست کے ساتھ مربوط کر دیا گیا ہے اور ادائیگیاں اس کے ذریعے کی جارہی ہیں۔

اجلاس کے آگاہ کیا گیا کہ اسلام آباد میں نئے کاروباری لائسنسز کے اجرا کو ڈیجیٹل ادائیگی کے نظام سے جوڑا گیا ہے اور موجودہ تمام دکانوں کو راست کیو آر کوڈز کے ذریعے ادائیگیاں وصول کرنے کی سہولت فراہم کی گئی ہے۔