دی آرگینک میٹ کمپنی لمیٹڈ (ٹی او ایم سی ایل)، جو پاکستان کی ایک معروف گوشت پراسیسنگ کمپنی ہے، نے پیر کے روز اعلان کیا ہے کہ اسے رواں مالی سال کے دوران مکمل کیے جانے والے 3.24 ملین ڈالر مالیت کے تصدیق شدہ برآمدی آرڈرز موصول ہوئے ہیں۔
یہ پیش رفت کمپنی نے پاکستان اسٹاک ایکسچینج (پی ایس ایکس) کو جمع کروائے گئے ایک نوٹس میں ظاہر کی۔
ٹی او ایم سی ایل نے مزید بتایا کہ اس نے تاجکستان کی مخصوص درآمدی ضروریات اور ریگولیٹری معیارات کے مطابق تیار کردہ فریز شدہ بغیر ہڈی والے بیف کی پیداوار اور برآمدات کا آغاز کر دیا ہے۔
نوٹس میں کہا گیا کہ”ٹی او ایم سی ایل کو یہ اعلان کرتے ہوئے خوشی ہے کہ اس نے دولت مشترکہ ریاستوں (سی آئی ایس) کے خطے میں ایک نئے بین الاقوامی مارکیٹ – تاجکستان – میں کامیابی سے داخلہ حاصل کر لیا ہے۔“
کمپنی نے مزید کہا کہ یہ اس کی اعلیٰ صلاحیت والے ابھرتے ہوئے بازاروں میں مسلسل توسیع اور پاکستان سے حلال گوشت کے ایک ممتاز برآمد کنندہ کے طور پر اس کی پوزیشن کو مضبوط بنانے کی علامت ہے۔
ٹی او ایم سی ایل کو 2010 میں پاکستان میں ایک نجی کمپنی کے طور پر شامل کیا گیا تھا، اور یہ حلال گوشت اور اس سے متعلقہ مصنوعات کی پراسیسنگ اور فروخت کے شعبے میں سرگرم ہے۔ یہ سرخ گوشت اور گوشت کی ضمنی مصنوعات کی صفِ اول کی برآمدی کمپنیوں میں سے ایک ہے۔
مشرق وسطیٰ کے ممالک ٹی او ایم سی ایل کی برآمدات کی بڑی منڈی ہیں۔
تاہم، کمپنی نے حالیہ برسوں میں پالتو جانوروں کی خوراک کے خام مال کو اپنی مصنوعات میں شامل کیا ہے، جس سے اسے امریکہ اور یورپ کی منڈیوں تک بھی رسائی حاصل ہوئی ہے۔ اس کے علاوہ، کمپنی مشرق بعید، دولت مشترکہ ریاستوں، اور جنوبی ایشیائی منڈیوں میں بھی نمایاں کاروباری سرگرمیاں رکھتی ہے۔
سال 2021 میں، چینی کسٹمز حکام نے ٹی او ایم سی ایل کو چین کو تیار شدہ بیف کی برآمدات کی اجازت دی تھی۔
کمپنی کا یہ بھی دعویٰ ہے کہ وہ پاکستان کی پہلی کمپنی ہے جس نے ویکیوم پیک تازہ بیف گوشت کی برآمدات کا آغاز کیا، اور یہ واحد کمپنی ہے جو مٹن اور کواٹر بیف کے کارکاسز کو ویکیوم پیک یا بلاسٹ فریز کرنے کی ٹیکنالوجی کی حامل ہے۔