پاکستان دہشت گردی اور دنیا کے درمیان دیوار بن کر کھڑا ہے، محسن نقوی، کانگریس کے وفد سے ملاقات

وزیر داخلہ محسن نقوی نے امریکی کانگریس کے وفد کے ساتھ اعلیٰ سطح ملاقات میں پاکستان کے کردار کو ’دہشت گردی اور باقی دنیا کے درمیان دیوار‘ قرار دیتے ہوئے عالمی دہشت گردی کے خلاف مضبوط بین الاقوامی تعاون پر زور دیا ہے۔ یہ بات وزارت داخلہ کے اعلامیے میں بتائی گئی ہے۔

وزیر داخلہ نے امریکی کانگریس کے ارکان جیک برگمین، ٹام سوزی اور جوناتھن جیکسن سے بات چیت کے دوران دہشت گردی کے خلاف جنگ میں پاکستان کے فرنٹ لائن کردار پر زور دیا۔

اسلام آباد میں ہونے والے اجلاس میں وزیر مملکت برائے داخلہ طلال چوہدری، قائم مقام امریکی سفیر نیٹلی بیکر اور وفاقی سیکرٹری داخلہ خرم آغا نے بھی شرکت کی۔

ملاقات کے دوران دوطرفہ تعلقات اور باہمی دلچسپی کے امور پر تفصیلی تبادلہ خیال کیا گیا۔

فریقین نے معیشت، تجارت اور سرمایہ کاری کے شعبوں میں تعاون بڑھانے پر تبادلہ خیال کیا۔

محسن نقوی نے کہا کہ امریکہ کے ساتھ مضبوط اور پائیدار تعلقات پاکستان کی خارجہ پالیسی میں کلیدی حیثیت رکھتے ہیں۔

وفاقی وزیر نے کہا کہ 30 اپریل کو امریکہ میں پاکستان کاکس کا انعقاد خوش آئند ہوگا۔

انہوں نے کہا کہ دہشت گردی ایک عالمی چیلنج ہے اور عالمی برادری کو پاکستان کے ساتھ مکمل تعاون کرنا چاہیے۔

انہوں نے اس بات پر زور دیا کہ انسداد دہشت گردی کے شعبے میں انٹیلی جنس اور ٹیکنالوجی کا تبادلہ انتہائی اہمیت کا حامل ہے۔

محسن نقوی نے مزید کہا کہ دہشت گردی کے خلاف پاکستان کی بے پناہ قربانیاں عالمی تناظر میں بے مثال ہیں اور امریکی کانگریس کے ارکان کا دورہ دہشت گردی کے خلاف جنگ میں پاکستان کے بے مثال کردار کو اجاگر کرنے میں اہم ثابت ہوگا۔

انہوں نے پاکستان منرلز انویسٹمنٹ فورم 2025 میں امریکی وفد کی شرکت کا خیر مقدم کرتے ہوئے اس بات پر زور دیا کہ حکومت سرمایہ کاروں کو ہر ممکن سہولت اور مکمل تحفظ فراہم کرنے کو یقینی بنائے گی۔

وزیر مملکت برائے داخلہ طلال چوہدری نے کہا کہ جون میں اسلام آباد میں ہونے والا انسداد دہشت گردی ڈائیلاگ انسداد دہشت گردی کے شعبے میں باہمی تعاون کو فروغ دینے میں کلیدی کردار ادا کرے گا۔

کانگریس کے وفد نے پاکستان کی انسداد دہشت گردی کی کوششوں کا اعتراف کرتے ہوئے کہا کہ دہشت گردی کے خلاف جنگ میں پاکستان کے کردار کو اجاگر کرنے کی ضرورت ہے۔

انہوں نے پاکستانی نژاد امریکیوں کی خدمات کو ”انتہائی باصلاحیت اور اہم“ قرار دیتے ہوئے اس کی تعریف کی ہے۔