نیشنل فوڈز نے شارجہ میں اپنی ذیلی کمپنی کی بندش کا عمل مکمل کرلیا

نیشنل فوڈز نے شارجہ میں اپنی ذیلی کمپنی کی بندش کا عمل مکمل کرلیا۔

نیشنل فوڈز ڈی ایم سی سی جو کہ نیشنل فوڈز لمیٹڈ (این اے ٹی ایف) کی دبئی میں واقع مکمل ملکیتی ذیلی کمپنی ہے نے اپنے ذیلی ادارے نیشنل فوڈز (ایف زیڈ ای) کو جو کہ شارجہ یو اے ای میں رجسٹرڈ ہے بند کرنے کا فیصلہ کیا ہے۔

اس پیش رفت سے نیشنل فوڈز لمیٹڈ (این اے ٹی ایف) نے پیر کو پاکستان اسٹاک ایکسچینج (پی ایس ایکس) کو ایک نوٹس کے ذریعے آگاہ کیا۔

نوٹس میں کہا گیا ہے کہ ہم آپ کو مطلع کرنا چاہتے ہیں کہ دبئی میں واقع کمپنی کے مکمل ملکیتی ماتحت ادارے نیشنل فوڈز ڈی ایم سی سی نے متحدہ عرب امارات کے شہر شارجہ میں رجسٹرڈ اپنے ماتحت ادارے نیشنل فوڈز (ایف زیڈ ای) کو تحلیل اور بند کرنے کا کام کامیابی سے مکمل کرلیا ہے۔

اس پیش رفت کے بعد نیشنل فوڈز کے حصص کی قیمت پیر کو کاروبار کے ابتدائی اوقات کے دوران 2.66 روپے یا 1.48 فیصد اضافے سے 181.99 روپے پر جاپہنچی۔

این اے ٹی ایف کو 1971 میں ایک پرائیویٹ لمیٹڈ کمپنی کے طور پر پاکستان میں شامل کیا گیا تھا اور بعد میں اسے پبلک لمیٹڈ کمپنی میں تبدیل کردیا گیا تھا۔

کمپنی کی بنیادی سرگرمی غذائی مصنوعات کی تیاری اور فروخت ہے۔ کمپنی کے پاس تقریباً 12 وسیع کیٹیگریز میں 250 مصنوعات کا متنوع پورٹ فولیو ہے، اس کا عالمی سطح پر 5 براعظموں کے 40 ممالک میں اثرورسوخ ہے۔

اے ٹی سی ہولڈنگز (پرائیویٹ) لمیٹڈ این اے ٹی ایف کی حتمی ہولڈنگ کمپنی ہے۔