بالٹک سمندر میں روسی کارگو جہاز ڈرون حملے کے بعد آگ کی لپیٹ میں آگیا
- فن لینڈ کے بارڈر گارڈ کمانڈر الیا الین کے مطابق جہاز کے 16 رکنی عملے نے لائف بوٹس کے ذریعے جہاز خالی کیا اور بعدازاں قریبی روسی جہاز پر منتقل ہوگیا۔ عملہ روس واپس روانہ ہوگیا
بالٹک سمندر میں روسی فوج سے منسلک کارگو جہاز اسپارٹا ٹو ہفتے کو ڈرون حملے کا نشانہ بننے کے بعد آگ کی لپیٹ میں آگیا، جس کے بعد جہاز فن لینڈ کی سمندری حدود میں داخل ہوگیا۔ فن لینڈ کے حکام نے حملے میں یوکرین کے ملوث ہونے کا امکان ظاہر کیا ہے۔
فن لینڈ کے بارڈر گارڈ کمانڈر الیا الین کے مطابق جہاز کے 16 رکنی عملے نے لائف بوٹس کے ذریعے جہاز خالی کیا اور بعدازاں قریبی روسی جہاز پر منتقل ہوگیا۔ عملہ روس واپس روانہ ہوگیا۔
فن لینڈ کی مسلح افواج کے ترجمان نے کہا کہ حملے کے پیچھے یوکرین کا ہاتھ ہونے کا امکان ہے، تاہم جہاز کو نشانہ بنانے کی وجہ واضح نہیں۔
روسی جہاز روس کے علاقے کالینن گراڈ جا رہا تھا اور گوگ لینڈ جزیرے کے مغرب میں بین الاقوامی پانیوں میں اسے نقصان پہنچا۔ جہاز پر آگ ہفتے کی رات تک جاری تھی اور فن لینڈ امدادی کارروائی کی قیادت کر رہا تھا۔
فن لینڈ نے ڈرون حملوں کے خطرے کے پیش نظر مشرقی خلیج فن لینڈ میں فضائی اور بحری پابندیاں عائد کردیں۔ حکام کے مطابق امدادی کارروائی کے دوران ایک روسی ہیلی کاپٹر کی جانب سے فن لینڈ کی فضائی حدود کی مختصر خلاف ورزی کا شبہ بھی ظاہر کیا گیا۔
فن لینڈ، سویڈن اور ایسٹونیا نے امدادی کارروائی میں حصہ لیا۔ جہاز امریکی پابندیوں کی زد میں ہے اور روسی کمپنی اوبورون لاجسٹیکا کی ملکیت ہے، جو روسی وزارت دفاع کو لاجسٹک خدمات فراہم کرتی ہے۔
فن لینڈ کے حکام نے کہا کہ جہاز پر موجود سامان کی تصدیق نہیں ہوسکی، تاہم فوجی سازوسامان کی موجودگی کو خارج از امکان قرار نہیں دیا جاسکتا۔


Comments