یمن کے شہر عدن میں منقسم حکومتی افواج حوثیوں کے حملے کے پیش نظر دفاع کی تیاریوں میں مصروف
- حوثیوں کی پیش قدمی کے پیش نظر عدن کے دفاع کی کوششیں حریف دھڑوں اور ان کے خلیجی سرپرستوں کے درمیان گہری چپقلش کے باعث بری طرح متاثر ہو رہی ہیں، جس سے شہر کے تحفظ کی کوششیں کمزور پڑ رہی ہیں
یمن کے حوثی باغی منقسم حکومتی افواج کے مقابلے میں عارضی دارالحکومت عدن کی جانب پیش قدمی کر رہے ہیں، جس کے باعث شہر کے مکینوں کو ایک مشکل صورت حال کا سامنا ہے کہ وہ گولہ باری کی زد میں رہیں یا اپنا گھر بار چھوڑ کر پسماندہ دیہی علاقوں میں پناہ لیں۔
یمن میں 2015ء کی خونریز جھڑپوں کے بعد سے عدن میں بڑے پیمانے پر جنگ نہیں ہوئی تھی۔ یہ جھڑپیں اس وقت شروع ہوئی تھیں جب بین الاقوامی سطح پر تسلیم شدہ حکومت حوثیوں کے زیر قبضہ دارالحکومت صنعاء سے نکل کر اس بندرگاہی شہر میں منتقل ہوگئی تھی۔ تاہم اب عدن میزائل اور ڈرون حملوں کی زد میں ہے۔
عدن میں اپنے اہل خانہ کے ساتھ رہنے والے سابق فوجی طارق عبدالرحمٰن نے کہا، ’’اس شہر پر خوف ناک انداز میں راکٹ داغے جا رہے ہیں۔ لوگ مسلسل خوف اور بے چینی کی کیفیت میں ہیں۔‘‘
منقسم دفاعی محاذ
یمن کی خانہ جنگی چار سالہ جنگ بندی کے بعد رواں موسم گرما میں دوبارہ شروع ہوئی تو حوثیوں نے تقریباً تمام محاذوں پر پیش قدمی کی۔ اب وہ شمال میں پہاڑی محاذ پر عدن سے صرف 80 کلومیٹر جبکہ مغرب میں صحرائی شاہراہ کے راستے 110 کلومیٹر دور رہ گئے ہیں، جہاں قدرتی رکاوٹیں نہ ہونے کے برابر ہیں۔
بحیرہ ہند میں واقع معدوم آتش فشاں کے اطراف آباد عدن میں موجود فورسز نے چیک پوسٹیں قائم کرلی ہیں، اضافی نفری تعینات کردی ہے، خندقیں کھود لی ہیں اور محاذ تک جانے والی سڑکوں پر مٹی کے مورچے اور رکاوٹیں کھڑی کردی ہیں۔ مقامی رہائشیوں اور فوجی ذرائع نے یہ بات بتائی۔
تاہم حریف دھڑوں کے درمیان اختلافات اور ان کے خلیجی سرپرستوں کے باہمی تنازعات نے حوثیوں کی پیش قدمی روکنے کی حکومتی کوششوں کو کمزور کردیا ہے، جس سے شہر کے دفاع کو بھی نقصان پہنچنے کا خدشہ ہے۔ تجزیہ کاروں کے مطابق حوثیوں کو ایران کی حمایت حاصل ہے۔
برطانیہ میں قائم رائل یونائیٹڈ سروسز انسٹی ٹیوٹ سے وابستہ یمن امور کے تجزیہ کار محمد الباشا نے کہا، ’’یہ فورسز حوثیوں کی صورت میں ایک مشترکہ دشمن تو رکھتی ہیں، لیکن ان کے سیاسی مقاصد، علاقائی ترجیحات اور لڑنے کے عزم میں یکسانیت نہیں۔‘‘
رواں ہفتے عدن کی ایک چیک پوسٹ پر فوجی گاڑیوں کی نگرانی اور تلاشی لے رہے تھے، جبکہ وہاں صرف سابق ریاست جنوبی یمن کے پرچم دکھائی دے رہے تھے، جس نے 1990ء میں شمالی یمن کے ساتھ اتحاد کیا تھا۔
عدن میں عام نظر آنے والے یہ پرچم جنوبی گروپوں کے اس مقصد کی عکاسی کرتے ہیں کہ وہ شمالی یمن کے ساتھ اتحاد ختم کرکے علیحدہ ریاست بحال کرنا چاہتے ہیں۔ تاہم ان گروپوں کے درمیان بھی شدید اختلافات ہیں، جو ماضی میں پرتشدد جھڑپوں کی صورت اختیار کرچکے ہیں۔
گزشتہ موسم سرما میں سعودی عرب کی حمایت یافتہ فورسز اور متحدہ عرب امارات کے حمایت یافتہ جنوبی عبوری کونسل کے درمیان علاقوں پر کنٹرول کے لیے کئی ہفتوں تک لڑائی جاری رہی۔ اس کا نتیجہ یہ نکلا کہ متحدہ عرب امارات حوثیوں کے خلاف لڑنے والے فوجی اتحاد سے الگ ہوگیا، جبکہ سعودی حمایت یافتہ ایک دھڑا جنوبی عبوری کونسل سے علیحدہ ہوگیا اور اس کی قیادت نے حکومت چھوڑ دی۔
جنوبی عبوری کونسل نے حوثیوں کے خلاف تازہ لڑائی میں حصہ نہیں لیا، تاہم اس نے ضرورت پڑنے پر عدن اور جنوبی علاقوں کے دفاع کا عزم ظاہر کیا ہے۔ جنوبی یمن کے بعض دیگر دھڑوں نے سابق شمالی یمن کے علاقوں پر قبضے کے لیے لڑنے سے انکار کردیا ہے۔
جنوبی عبوری کونسل کے ترجمان انور التمیمی نے کہا کہ جنوبی علاقوں کے دفاع کے لیے دیگر گروپوں کے ساتھ زمینی سطح پر رابطہ کاری جاری ہے اور یہ سلسلہ برقرار رہے گا۔ تاہم انہوں نے حکومت کی جانب سے حوثیوں مخالف فورسز کے لیے واضح کمان اور کنٹرول کا نظام قائم کرنے کی کوششوں کی افادیت پر تنقید کی۔
انہوں نے مزید کہا کہ جنوبی عبوری کونسل کے سیاسی مطالبات، جن میں جنوبی یمن کی علیحدگی کے لیے ریفرنڈم کا انعقاد بھی شامل ہے، پر توجہ دینا ضروری ہے۔
انور التمیمی نے کہا، ’’ہم اپنے فوجیوں کو کسی ایسی کارروائی میں نہیں بھیجیں گے جس کی کوئی حکمت عملی نہ ہو اور جس کے نتیجے میں سیاسی تصفیے کی کوئی راہ بھی موجود نہ ہو۔‘‘
شہر کی سڑکوں پر خوف و ہراس
عدن میں رہنے والے عبدالرحمٰن نے بتایا کہ انہیں رات کے وقت نیند نہیں آتی۔ بعض اوقات شہر میں میزائل گرنے کی آواز سے ان کی آنکھ کھل جاتی ہے، جبکہ دیگر راتوں میں وہ جنگ زدہ اور غریب ملک میں اپنے خاندان کے مستقبل کے بارے میں فکر مند رہتے ہیں۔
30 سال تک فوج میں خدمات انجام دینے والے عبدالرحمٰن اپنے نو افراد پر مشتمل خاندان کے ساتھ تین کمروں کے ایک سادہ مکان میں رہتے ہیں۔ انہوں نے کہا، ’’گولے بلاامتیاز سڑکوں، بازاروں اور گھروں پر گر رہے ہیں۔ اس سے لوگ شدید خوف زدہ ہیں۔‘‘
انہوں نے مزید کہا، ’’لوگ اپنے بچوں، خواتین اور گھروں میں موجود اہل خانہ کے بارے میں فکر مند ہیں۔۔۔ آخر کیا ہونے والا ہے؟ کل کیا صورت حال ہوگی؟‘‘
جنگ کے خدشات نے عبدالرحمٰن کی پہلے سے موجود مالی پریشانیوں میں بھی اضافہ کردیا ہے۔ ان کے مطابق ایسے شہر میں جہاں سرکاری ملازمین کی تنخواہیں بمشکل روزمرہ اخراجات پورے کرتی ہیں، وہ مقامی دکانداروں کے مقروض ہیں۔
انہوں نے بتایا کہ دکاندار انہیں ادھار دینے پر آمادہ ہیں، جس پر وہ شکر گزار ہیں، تاہم بڑھتے ہوئے قرض کے باعث انہیں مسلسل احساسِ ندامت رہتا ہے۔
جنگ دوبارہ شہر کے قریب پہنچنے سے ان کے خاندان کی پریشانیاں مزید بڑھ گئی ہیں اور اب انہیں ایک کڑے فیصلے کا سامنا ہے۔
انہوں نے کہا، ’’مجھے سمجھ نہیں آرہا کہ شہر میں رہوں یا دیہی علاقے واپس چلا جاؤں۔‘‘ ان کے بقول، دونوں صورتوں میں مستقبل تاریک دکھائی دیتا ہے اور انہیں یہ بھی یقین نہیں کہ ان کا خاندان شہر سے باہر جانے کا کرایہ برداشت کرسکے گا۔
یمن میں جنگ دوبارہ شروع ہونے کے بعد سے اب تک لاکھوں افراد بے گھر ہوچکے ہیں۔ ان میں سے بہت سے لوگ ملک کے تیسرے بڑے شہر تعز کے گرد پہاڑی علاقوں میں قائم چھوٹے خیمہ بستیوں میں معمولی امدادی سامان کے سہارے زندگی گزار رہے ہیں۔ تعز شہر کا محاصرہ بھی حوثیوں نے کر رکھا ہے۔
عدن میں تعمیراتی مقامات پر یومیہ اجرت پر کام کرنے والے خالد عبدو کے 10 بچے ہیں اور انہیں بمشکل اتنا کام ملتا ہے کہ گھر کا خرچ چل سکے۔ ان کے مطابق وہ ایک ہفتے سے زیادہ عرصے سے کام نہیں کرسکے۔
حوثیوں کی جانب سے بڑھتے ہوئے خطرے نے ان کی مشکلات میں مزید اضافہ کردیا ہے۔ انہوں نے کہا، ’’ہم امن و استحکام چاہتے ہیں اور چاہتے ہیں کہ یمن دوبارہ ایک ریاست بن جائے، جیسا کہ ہم پہلے زندگی گزارتے تھے۔‘‘


Comments