فیلڈ مارشل عاصم منیر کا شمالی وزیرستان کا دورہ، سیکیورٹی صورتحال کا جائزہ لیا
- انٹیلی جنس بنیادوں پر کارروائیوں اور سیکیورٹی صورتحال پر بریفنگ، شہدا کو خراج عقیدت
چیف آف آرمی اسٹاف و چیف آف ڈیفنس فورسزفیلڈ مارشل سید عاصم منیر نے جمعہ کو شمالی وزیرستان کے علاقے میران شاہ کا دورہ کیا جہاں انہوں نے سیکیورٹی کی موجودہ صورتحال اور جاری انسداد دہشت گردی کی کارروائیوں کا جائزہ لیا۔
پاک فوج کے شعبہ تعلقات عامہ (آئی ایس پی آر) کے مطابق میران شاہ پہنچنے پر آرمی چیف نے یادگارِ شہدا پر پھولوں کی چادر چڑھائی اور فرائض کی انجام دہی کے دوران اپنی جانوں کا نذرانہ پیش کرنے والے فوجی جوانوں کو خراج عقیدت پیش کیا۔
دورے کے دوران فیلڈ مارشل عاصم منیر کو علاقے کی سیکیورٹی صورتحال، انٹیلیجنس بنیادوں پر جاری کارروائیوں اور انسداد دہشتگردی کی کوششوں کے ذریعے حاصل ہونے والی کامیابیوں کو مستحکم کرنے کیلئے کیے جانے والے اقدامات پر تفصیلی بریفنگ دی گئی۔ انہیں علاقے میں دیرپا امن و استحکام یقینی بنانے کے اقدامات سے بھی آگاہ کیا گیا۔
انہوں نے دورے کے دوران افسران اور جوانوں سے ملاقات بھی کی اور ملک کے دفاع و سلامتی کے لیے ان کی پیشہ ورانہ مہارت، تیاری اور عزم کو سراہا۔
آرمی چیف نے خیبرپختونخوا پولیس کی بھی تعریف کرتے ہوئے اسے دہشتگردی کے خلاف جنگ میں ایک بہادر صفِ اول کی فورس قرار دیا اور اس کی ثابت قدمی اور قربانیوں پر فخر کا اظہار کیا۔
انہوں نے قانون نافذ کرنے والے اداروں (ایل ای ایز) کے ساتھ مل کر دہشتگردی کے مکمل خاتمے اور خیبر پختونخوا میں امن و استحکام برقرار رکھنے کے لیے سیکیورٹی فورسز کے عزم کا اعادہ کیا۔
آئی ایس پی آر کے بیان کے مطابق کور کمانڈر پشاور نے آمد پر چیف آف آرمی اسٹاف و چیف آف ڈیفنس فورسز کا استقبال کیا۔


Comments