جاپان کی ایشیا میں تیل ذخیرہ کرنے کیلئے مشترکہ ٹاسک فورس بنانے کی تجویز
- تاکائیچی نے مشرق وسطیٰ کے تیل پیدا کرنے والے ممالک اور ایشیائی توانائی صارفین کے درمیان تعاون مضبوط بنانے کے لیے پاور گلف انیشی ایٹو کی تجویز بھی پیش کی
جاپان نے منگل کو ایشیائی ممالک کے درمیان تیل کے ذخائر جمع کرنے اور ہنگامی حالات میں تیل کی فراہمی یقینی بنانے کے لیے ایک مشترکہ ٹاسک فورس قائم کرنے کی تجویز پیش کردی، جس کے تحت خطے کے ہمسایہ ممالک جاپان کی غیر استعمال شدہ ذخیرہ کرنے کی گنجائش سے بھی فائدہ اٹھا سکیں گے۔
جاپان کی وزیراعظم سانائے تاکائیچی نے منیلا میں آسیان سربراہی اجلاس کے موقع پر جنوب مشرقی ایشیائی رہنماؤں سے خطاب کرتے ہوئے کہا کہ اس اقدام کو فلپائن کی قیادت میں شروع کیے جانے والے مشترکہ تیل ذخیرہ کرنے کے منصوبے کے ساتھ مربوط کیا جائے گا۔ ان کے مطابق اس منصوبے کو ایشیا میں عالمی توانائی ایجنسی (آئی ای اے) کے متبادل کے طور پر فروغ دینے کا ارادہ ہے۔
تاکائیچی نے مشرق وسطیٰ کے تیل پیدا کرنے والے ممالک اور ایشیائی توانائی صارفین کے درمیان تعاون مضبوط بنانے کے لیے پاور گلف انیشی ایٹو کی تجویز بھی پیش کی۔
ایران جنگ کے بعد آبنائے ہرمز کے ذریعے تیل اور گیس کی ترسیل میں ممکنہ رکاوٹوں کے خدشات نے ایشیائی ممالک کو توانائی تحفظ بہتر بنانے پر مجبور کردیا ہے۔ جاپان کے ادارہ برائے قدرتی وسائل و توانائی کے مطابق اس گزرگاہ سے منتقل ہونے والے خام تیل کا تقریباً 90 فیصد ایشیا جاتا ہے۔
فلپائن کے صدر فرڈینینڈ مارکوس جونیئر نے بھی کہا کہ ان کا ملک اسٹریٹجک پیٹرولیم ذخائر کے منصوبے پر پیش رفت کررہا ہے اور توانائی کے منصوبوں میں سرمایہ کاری حاصل کرنے کی کوشش کررہا ہے۔ ان کے مطابق صرف تیل ذخیرہ کرنا کافی نہیں، بلکہ تیل پیدا کرنے اور استعمال کرنے والے ممالک کو مشترکہ اقدامات کرنا ہوں گے۔
انہوں نے سمندری تجارتی راستے کھلے رکھنے، معلومات کے تبادلے اور ذخیرہ کرنے کے انتظامات مضبوط بنانے پر بھی زور دیا۔


Comments