فیلڈ مارشل عاصم منیر سے علاقائی امن و سلامتی پر گفتگو کی، ایرانی وزیر خارجہ
- یہ پیش رفت ایسے وقت میں سامنے آئی ہے جب مشرقِ وسطیٰ میں کشیدگی کم کرنے کے لیے سفارتی کوششوں میں تیزی آرہی ہے
ایرانی وزیر خارجہ عباس عراقچی کے ٹیلی گرام اکاؤنٹ کے مطابق، انہوں نے فیلڈ مارشل عاصم منیر کے ساتھ پیر کے روز علاقائی امن و سلامتی کو درپیش چیلنجز پر تبادلہ خیال کیا ہے۔
یہ پیش رفت ایسے وقت میں سامنے آئی ہے جب مشرقِ وسطیٰ میں کشیدگی کم کرنے اور تنازع کو وسیع تر علاقائی جنگ میں تبدیل ہونے سے روکنے کے لیے سفارتی کوششوں میں تیزی آرہی ہے۔ متعدد ممالک نے اہم فریقین کے ساتھ سفارتی روابط بڑھا دیے ہیں تاکہ دشمنی میں کمی لائی جاسکے اور مذاکرات کے لیے گنجائش پیدا کی جاسکے، جبکہ تنازع کے مزید شدت اختیار کرنے کے ممکنہ معاشی اور سلامتی کے اثرات پر بھی تشویش پائی جاتی ہے۔
تنازع نے علاقائی استحکام کے حوالے سے خدشات بڑھا دیے ہیں، بالخصوص اس لیے کہ عالمی توانائی کی فراہمی اور تجارتی راستوں کے تناظر میں مشرقِ وسطیٰ کو تزویراتی اہمیت حاصل ہے۔ کشیدگی میں مزید اضافے سے تیل اور گیس کی ترسیل متاثر ہوسکتی ہے، توانائی کی قیمتوں میں مزید اضافہ ہوسکتا ہے اور عالمی منڈیوں میں غیر یقینی صورت حال بڑھ سکتی ہے، جس کے پاکستان جیسے تیل درآمد کرنے والے ممالک پر نمایاں اثرات مرتب ہونے کا خدشہ ہے۔
پاکستان بھی کشیدگی میں کمی لانے کے لیے سفارتی کوششوں میں سرگرم کردار ادا کر رہا ہے اور علاقائی و عالمی فریقین کے ساتھ رابطے برقرار رکھتے ہوئے مذاکرات اور تحمل کی ضرورت پر زور دے رہا ہے۔


Comments