چھاپے مارنے میں آسانیاں

مالی سال 2029 تک آئی ٹی برآمدات 10 ارب ڈالر تک پہنچانے کا ہدف رکھنے والی حکومت کے لیے یہ ایک عجیب و غریب تشہیر ہے کہ سائبر کرائم کے تفتیش کار فعال سافٹ ویئر ہاؤسز میں داخل ہوں اور وہ آلات اٹھا کر لے جائیں جن کے ذریعے غیر ملکی صارفین کو خدمات فراہم کی جاتی ہیں۔ یہ صورت حال پاکستان کے سرمایہ کاری کے ماحول کے بارے میں ایک منفی تاثر پیدا کرتی ہے۔

تاہم، پاکستان سافٹ ویئر ہاؤسز ایسوسی ایشن (پاشا) نے اسی نوعیت کی رکاوٹوں کی نشاندہی کی ہے۔ ایسوسی ایشن کا الزام ہے کہ نیشنل سائبر کرائم انویسٹی گیشن ایجنسی (این سی سی آئی اے) کی ٹیمیں رجسٹرڈ کمپنیوں میں بغیر وارنٹ دکھائے داخل ہوئیں، ملازمین سے گھنٹوں پوچھ گچھ کی اور لیپ ٹاپس و سرورز قبضے میں لے لیے، حتیٰ کہ ان مقامات پر بھی جہاں کوئی غیر قانونی سرگرمی نہیں پائی گئی۔ اگر یہ شکایات درست ثابت ہوئیں تو اس سے ظاہر ہوتا ہے کہ ریاست خود اس صنعت کو نقصان پہنچا رہی ہے جس کے فروغ کے وعدے وہ بار بار کرتی ہے۔

ان الزامات کا تقاضا ہے کہ محض ایک بار پھر سرکاری یقین دہانیاں کرانے کے بجائے عملی اقدامات کیے جائیں۔ آن لائن فراڈ کے خلاف کارروائی اور دھوکا دہی کے مراکز کا خاتمہ ضروری ہے، کیونکہ ایسی کارروائیاں متاثرین اور پاکستان کی ساکھ کا تحفظ کرتی ہیں۔ فراڈ کرنے والے افراد آئی ٹی کمپنیوں کے نام پر کاروبار رجسٹر کرا سکتے ہیں، اس لیے محتاط تحقیقات ضروری ہیں۔ تاہم، قانون نافذ کرنے کی ذمہ داری سونپی گئی کسی بھی ایجنسی کے لیے ضروری ہے کہ وہ خود قانون کی پابندی کے معاملے میں خاص طور پر محتاط رہے۔ تلاشی کے لیے مناسب قانونی اختیار ہونا چاہیے، عملے کے ساتھ عزت و احترام سے پیش آنا چاہیے اور شواہد کو شفاف اور دستاویزی طریقہ کار کے تحت محفوظ کیا جانا چاہیے۔ ہراساں کرنا اور بلاامتیاز سامان ضبط کرنا تفتیشی صلاحیت کا متبادل نہیں بن سکتا۔

اس کے تجارتی نتائج فوری طور پر سامنے آتے ہیں۔ ضبط کیا گیا ایک سرور ہزاروں میل دور موجود صارفین کو فراہم کی جانے والی خدمات میں خلل ڈال سکتا ہے، جبکہ قبضے میں لیا گیا ایک لیپ ٹاپ ایسی خفیہ معلومات پر مشتمل ہوسکتا ہے جن کا تحفظ کرنا پاکستانی سروس فراہم کرنے والے ادارے پر معاہدے کے تحت لازم ہو۔ غیر ملکی صارفین اپنے فیصلے اس سے بہت پہلے کرلیتے ہیں کہ کسی متنازع چھاپے کی تحقیقات مکمل ہوں یا سرکاری وضاحت سامنے آئے۔ ان کے پاس بھارت، فلپائن اور مشرقی یورپ میں متبادل موجود ہیں، اور مسلسل کاروبار اور ساکھ پر انحصار کرنے والی صنعت اپنے صارفین کو ملک چھوڑنے کی وجوہات فراہم کرنے کی متحمل نہیں ہوسکتی۔

یہی وجہ ہے کہ حکومت کی یہ روایتی عادت کہ پہلے کارروائی کی جائے اور بعد میں مشاورت، خاص طور پر نقصان دہ ثابت ہوتی ہے۔ پاکستان کے حکام بار بار اہم نوعیت کے اقدامات کا اعلان کرتے ہیں، متعلقہ فریقوں کے احتجاج کے بعد ان کے عملی نقصانات کا احساس کرتے ہیں اور پھر ان حفاظتی اقدامات پر بات چیت شروع کرتے ہیں جو ابتدا ہی میں وضع کیے جانے چاہییں تھے۔ پاشا اب این سی سی آئی اے، وزارت انفارمیشن ٹیکنالوجی و ٹیلی کمیونیکیشن اور پاکستان سافٹ ویئر ایکسپورٹ بورڈ پر مشتمل مشترکہ رابطہ اور شکایات کمیٹی قائم کرنے کا مطالبہ کر رہی ہے۔ جب نفاذ قانون کی کارروائیوں سے رجسٹرڈ کمپنیوں کے کام میں خلل پڑنا شروع ہوا تو اس سے پہلے ہی صنعت کے ساتھ کوئی مؤثر رابطہ کاری کا نظام کیوں قائم نہیں کیا گیا؟ مشاورت کوئی غیر معمولی انتظامی جدت نہیں ہے۔

اعداد و شمار اس خطرے کی وسعت کو واضح کرتے ہیں۔ پاشا کے مطابق مالی سال 2026 میں آئی ٹی برآمدات 4.6 ارب ڈالر تک پہنچ گئیں، جبکہ اس صنعت کی شرح نمو تقریباً 20 فیصد رہی۔ برآمدات کا یہ ہدف حکومت کے پروگرام اڑان پاکستان کا بھی حصہ ہے۔ اس ہدف کی حقیقت پسندی کے بارے میں کسی کی بھی رائے ہو، اسے اس صورت میں حاصل نہیں کیا جاسکتا کہ بیرون ملک موجود صارفین یہ سوچنے پر مجبور ہوجائیں کہ ان کا کام انجام دینے والے سرورز اگلے روز بھی دستیاب ہوں گے یا نہیں۔ سرمایہ کاری کے فیصلوں کا انحصار قابل پیش گوئی قواعد و ضوابط، کاروباری سرگرمیوں کے تسلسل اور اس اعتماد پر ہوتا ہے کہ تنازعات کو منصفانہ طریقے سے حل کیا جائے گا۔

اس مسئلے کے عملی حل موجود ہیں۔ تفتیش کاروں کو کمپنیوں کی رجسٹریشن کی تصدیق کرنی چاہیے، تاہم رجسٹریشن کو تحقیقات سے استثنیٰ نہیں سمجھنا چاہیے۔ تلاشی مناسب عدالتی اجازت کے تحت لی جانی چاہیے، جہاں تک ممکن ہو ڈیجیٹل شواہد کو باقاعدہ ریکارڈ شدہ فرانزک امیجنگ کے ذریعے محفوظ کیا جانا چاہیے اور آلات کو تحویل میں لینے کا عمل صرف ان چیزوں تک محدود ہونا چاہیے جن کی تحقیقات کے لیے واقعی ضرورت ہو۔ غیر متعلقہ آلات سات روز کے اندر واپس کرنے کی پاشا کی تجویز سنجیدگی سے غور کرنے کے لائق ہے۔ بدسلوکی، سی سی ٹی وی نظام میں مداخلت یا غیر قانونی طور پر سامان ضبط کرنے سے متعلق شکایات کی آزادانہ تحقیقات ہونی چاہییں اور جہاں بدعنوانی یا اختیارات کے ناجائز استعمال کا ثبوت ملے وہاں ذمہ داروں کا احتساب ہونا چاہیے۔ صنعت کے نمائندوں کی مشاورت سے واضح معیاری طریقہ کار (ایس او پیز) وضع کرنے سے قانون نافذ کرنے کی کارروائیاں کمزور نہیں بلکہ مزید مؤثر ہوں گی۔

سب سے بڑھ کر، این سی سی آئی اے اور حکومت کو جرائم پیشہ عناصر کے خلاف کارروائی کرنے اور پورے برآمدی شعبے کو غیر یقینی صورت حال سے دوچار کرنے کے درمیان فرق کو سمجھنا ہوگا۔ پاکستان نے بین الاقوامی کاروباری اداروں کو اپنی ڈیجیٹل صلاحیتوں پر اعتماد دلانے کے لیے کئی سال صرف کیے ہیں۔ ایک متاثرہ کاروباری معاہدہ اس اعتماد کو ختم کرسکتا ہے، جبکہ اسے دوبارہ بحال کرنے میں کسی نئی کمیٹی کے نوٹیفکیشن جاری کرنے سے کہیں زیادہ وقت لگتا ہے۔ جو ملک سافٹ ویئر برآمد کرنا چاہتا ہے، اسے شاید سب سے پہلے یہ یقینی بنانا چاہیے کہ اس کے سافٹ ویئر ہاؤسز کو اپنا کام کرنے دیا جائے۔

کاپی رائٹ بزنس ریکارڈر، 2026