غنی کیم ورلڈ کی پیداوار معطل، مقامی فروخت کیلئے وافر ذخیرہ موجود ہونے کا دعویٰ

غنی کیم ورلڈ لمیٹڈ نے وضاحت کی ہے کہ خلیجی خطے میں برآمدی آرڈرز اور بحری راستوں میں رکاوٹوں کے باعث پیداواری سرگرمیاں معطل ہونے کے باوجود کمپنی کے پاس مقامی فروخت کی ضروریات پوری کرنے کے لیے وافر ذخیرہ موجود ہے۔

پاکستان اسٹاک ایکسچینج (پی ایس ایکس) میں جمع کرائی گئی ایک وضاحت میں کمپنی کا کہنا تھا کہ اس کا موجودہ اسٹاک مقامی مارکیٹ میں فروخت کے لیے دستیاب ہے اور مینوفیکچرنگ (پیداوار) کی معطلی کو اسی اسٹاک کی دستیابی کے تناظر میں دیکھا جانا چاہیے۔

کمپنی کے مطابق برآمدات کو کاروبار اور ترقی کا اہم محرک بنانے کی منصوبہ بندی کی گئی تھی، تاہم خلیجی خطے کی موجودہ صورتحال، بحری راستوں میں رکاوٹوں اور بندرگاہوں پر رش کے باعث برآمدات اور درآمدات دونوں متاثر ہوئی ہیں۔ اس صورت حال میں برآمدی آرڈرز پورے کرنا ممکن نہ رہا جس کے نتیجے میں پیداوار معطل کرنا پڑی۔

غنی کیم ورلڈ نے کہا کہ پیداواری سرگرمیاں معطل رہنے کے دوران کمپنی اپنے جمع شدہ ذخیرے کو مقامی مارکیٹ میں فروخت کرنے کا ارادہ رکھتی ہے۔ کمپنی کے مطابق نئی پیداوار بند ہونے کے باوجود موجودہ اسٹاک مقامی فروخت کی بنیاد فراہم کرتا ہے، تاہم فروخت کا انحصار طلب اور مارکیٹ کی صورت حال پر ہوگا۔

کمپنی نے مزید کہا کہ پیداوار دوبارہ شروع ہونے پر پاکستان اسٹاک ایکسچینج کے ذریعے حصص یافتگان کو آگاہ کیا جائے گا جبکہ دیگر اہم پیشرفت سے بھی حسبِ ضرورت مطلع کیا جاتا رہے گا۔