کرم سیکٹر میں افغان طالبان کی بلااشتعال فائرنگ، پاک فوج کی سخت جوابی کارروائی

سرکاری ٹی وی پی ٹی وی نیوز نے ذرائع کے حوالے سے ہفتے کو رپورٹ کیا کہ پاک افغان سرحد پر کرم سیکٹر میں افغان طالبان کی بلااشتعال فائرنگ کے جواب میں پاکستانی فوج بھاری ہتھیاروں سے کارروائی کر رہی ہے۔

ذرائع کے مطابق پاک فوج کی جوابی کارروائی میں افغان طالبان کی متعدد چوکیاں تباہ ہوگئیں، جس کے نتیجے میں اہلکار اپنی پوزیشنیں چھوڑ کر فرار ہونے پر مجبور ہوگئے۔

ذرائع نے بتایا کہ افغان طالبان حکومت نے دہشت گردوں کی حمایت میں فائرنگ کی تھی۔

سیکیورٹی ذرائع کا کہنا تھا کہ پاک فوج چوکس ہے اور ملک کی سرحدوں کے دفاع اور قومی سلامتی کے تحفظ کے لیے پُرعزم ہے۔

دریں اثنا نیشنل اسٹریٹجک کمانڈ کے کمانڈر جنرل سید عامر رضا نے ہفتے کو خبردار کیا کہ خطے میں کسی بھی غلط اندازے یا مہم جوئی کا جواب مخالف کی سوچ سے بڑھ کر دیا جائے گا۔ انہوں نے زور دیا کہ جوہری ہتھیاروں کے حامل ممالک کے ماحول میں جنگ کی کوئی گنجائش نہیں۔

پاکستان ملٹری اکیڈمی (پی ایم اے) کاکول میں پاسنگ آؤٹ پریڈ سے خطاب کرتے ہوئے انہوں نے کہا کہ پاکستان سرحد پار جارحیت یا اپنی خودمختاری اور علاقائی سالمیت کی کسی بھی خلاف ورزی کو برداشت نہیں کرے گا۔

انہوں نے کہا کہ کوئی دشمن امن کے لیے ہمارے عزم کو کمزوری نہ سمجھے اور نہ ہی ہمارے تحمل کو عزم کی کمی تصور کرے۔ انہوں نے مزید کہا کہ مسلح افواج ملک کے ایک ایک انچ کے دفاع کے لیے تیار ہیں۔