پاکستان اور برازیل کے عسکری سربراہان کا دفاعی تعاون مضبوط بنانے پر تبادلہ خیال

پاکستان اور برازیل نے فوجی حکام کے درمیان ملاقات میں باہمی تعاون مزید مضبوط بنانے پر اتفاق کیا ہے۔

پاک فوج کے شعبہ تعلقات عامہ (آئی ایس پی آر) کے مطابق راولپنڈی میں جنرل ہیڈکوارٹرز (جی ایچ کیو) میں دونوں ممالک کے اعلیٰ فوجی حکام کے درمیان ملاقات ہوئی۔

برازیل کی مسلح افواج کے جوائنٹ چیفس آف اسٹاف کے سربراہ ایڈمرل ریناٹو روڈریگز ڈی اگویار فریئر نے اعلیٰ سطح کے وفد کی قیادت کرتے ہوئے پاکستان کے چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر سے ملاقات کی۔

آئی ایس پی آر کے مطابق ملاقات میں باہمی دلچسپی کے امور، علاقائی سلامتی کی صورتحال اور دفاع و سکیورٹی کے شعبوں میں دوطرفہ تعاون بڑھانے کے امکانات پر تبادلہ خیال کیا گیا۔

دونوں جانب سے پاکستان اور برازیل کے درمیان دیرینہ دوستانہ تعلقات پر اطمینان کا اظہار کیا گیا اور فوجی روابط مزید مستحکم کرنے پر اتفاق کیا گیا۔

فیلڈ مارشل عاصم منیر نے برازیل کے ساتھ دفاعی تعلقات مضبوط بنانے کے لیے پاکستان کے عزم کا اعادہ کیا۔ برازیل کے مہمان سربراہ نے پاک فوج کی پیشہ ورانہ مہارت اور آپریشنل تیاریوں کو سراہا اور علاقائی امن و استحکام کے لیے اس کی خدمات کا اعتراف کیا۔

آئی ایس پی آر کے مطابق یہ دورہ دفاعی تعاون گہرا کرنے اور دونوں ممالک کے درمیان فوجی تعلقات مضبوط بنانے کے مشترکہ عزم کی عکاسی کرتا ہے۔